Ыам ыйын 4—8 күннэригэр Магадаҥҥа буолбут олимпийскай чөмпүйүөн Валерий Попенченко кэриэһигэр бокска “А” кылаастаах Бүттүүн Арассыыйатааҕы күрэхтэһиигэ дойду уон түөрт регионуттан 89 спортсмен кытынна.
47-с төгүлүн ыытыллыбыт турнир бастыҥ боксерунан Ставропольеттан Николай Усманскай билиниллэн, күрэс сүрүн бирииһин – мас ладьяны – дойдутугар илдьэ барда.
Магадан рингэтигэр Хотугулуу-Илиҥҥи университет устудьуона, Ньурбатааҕы бокс оскуолатын иитиллээччитэ Михаил Хатылыков 52 киилэҕэ диэри ыйааһыҥҥа тэҥнээҕин булбата уонна, үөрүүлээҕэ диэн, спорт маастарын нуорматын толордо. Манна даҕатан эттэххэ, Михаил өрөспүүбүлүкэ чөмпүйүөнүнэн, Бүттүүн Арассыыйатааҕы турнирдар кыайыылаахтарынан буолар.
Бу турнирга өссө үс уолбут пьедестал үһүс үктэлин дабайда.
Ыспыраапка
Валерий Попенченко — Токиотааҕы (1964 сыл) Олимпийскай оонньуулар кыайыылаахтара, Европа икки төгүллээх, ССРС алта төгүллээх чөмпүйүөннэрэ, спорт үтүөлээх маастара. Токиотааҕы Олимпиадаҕа бастыҥ тиэхиньикэлээх боксерунан ааттанан, Вэл Баркер Кубогын хаһаайынынан буолбута. Сэбиэскэй кэмҥэ кини бу ситиһиитин ким да хатылаабатаҕа.
Роман Попов, “Саха сирэ” хаһыат, https://edersaas.ru