Урбаанньыт Михаил Соловьев: «Ил Дархан Анал этиититтэн элбэх саҥаны кэтэһэбин»
Ил Дархан Егор Борисов быйылгы Анал этиитин сэтинньи 22 күнүгэр оҥоруохтаах. Экспертэр олохтоох оҥорон таһаарыыга сүрүн болҕомтотун ууруо диэн сылыктыыллар. Холобур, бэһис Анал этиитигэр үбү-харчыны тардыы боппуруостарын таарыйан, өрөспүүбүлүкэҕэ 2015 сыл Урбаан сылынан биллэриллэн, судаарыстыба өттүттэн урбаанньыттарга, оҥорон таһаарааччыларга болҕомто күүһүрдэ.
Полиэтиленовай турбалары оҥоруунан дьарыктанар «Эгопласт» ХЭУо салайааччыта Михаил Соловьев «Саха сирэ» технопаарк резиденинэн буолар. Онон эдэр урбаанньыт Ил Дархан Егор Борисов уочараттаах Анал этитигэр болҕомтотун олохтоох оҥорон таһаарааччыларга туһаайыаҕа диэн бүк эрэллээх.
«Кэлиҥҥи сыллартан бэттэх, судаарыстыба олохтоох оҥорон таһаарааччылары өйөөн эрэр. Бэйэ бородууксуйатын ырыынакка таһаарарбытын сэргэ, үлэ миэстэтинэн хааччыйабыт. Билигин дьон өйө-санаата уларыйан, бэйэбит сирбитигэр оҥоһуллубут бородууксуйаларынан хото туһанан эрэбит. Биһиги предприятиебыт пластиковай турбалары итиэннэ бураҥҥа аналлаах дьоҕус сыарҕалары оҥорон таһаарар», – диэн Ил Дархан Анал этиититтэн үлэтин бэйэтин хайысхатынан элбэҕи, саҥаны кэтэһэрин бэлиэтээн эттэ.
Анивера АКИМОВА, edersaas.ru