Мииринэйгэ быраас буруйунан балтараа саастаах оҕо өлбүтүн туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Бу чахчынан РФ Холуобунай кодексатын 109-с ыст. 2-с чааһынан, ол эбэтэр, идэтинэн эбээһинэһин сөбө суохтук толорон, сэрэҕэ суохтан өлүүгэ тиэрдии бэлиэтэ баарынан, холуобунай дьыала тэрилиннэ.
Силиэстийэ сабаҕалыырынан, бу дьыл балаҕан ыйын 28 күнүгэр Айхал бөһүөлэгин олохтооҕо балтараа саастаах кыысчаана температурата тахсыбытыгар, «суһал көмөнү» иккитэ ыҥыра сылдьыбыт.
Маныаха «суһал көмө» медиктэрэ оҕону балыыһаҕа илдьибэккэ, учаастактааҕы педиатрга көрдөрөргө эппиттэр.
Сарсыныгар ийэ оҕотун бэйэтэ Айхал балыыһатыгар илдьибит. Онно учаастактааҕы терапевт оҕо туругун көрөн баран, тута балыыһаҕа киллэрэргэ эппит. Диагноһа — «острая респираторно-вирусная инфекция: острый ринофарингит, острый обструктивный бронхит» диэн эбит.
Балаҕан ыйын 30 күнүгэр оҕо эрэйдээх өлбүт…
Судебнай-медицинскэй экспертиза быһаарыытынан, оҕо өлүүтүн биричиинэтинэн ОРВИ буолбут.
Дьыала хаамыыта Силиэстийэлиир управление салайааччытын хонтуруолугар сылдьар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.