Быйылгы Ыччат ыһыаҕа Миирнэйгэ бэс ыйын 30 — от ыйын 2 күннэригэр ыытыллыаҕа. Миирнэй куораттан 10-тан тахса биэрэстэ тэйиччи сытар, 2011 сыллаахха Олоҥхо ыһыаҕа ыытыллыбыт сиригэр буолуоҕа. Сотору маны өрөмүөннүөхтэрэ, тупсарыахтара.
Ааспыт нэдиэлэҕэ тэрийэр бөлөх үлэтин саҕалаата. СӨ Ыччатын миниистирэ Афанасий Владимиров, Миирнэй оройуонун ыччатын кэмитиэтин бэрэссэдээтэлэ Алексей Болотин, култуура, Суһал быһыы-майгы министиэристибэлэриттэн мустан, маҥнайгы былаанныыр мунньаҕы тэрийдилэр.
Сайын Дьокуускай куораттан Миирнэйгэ диэри айанныыр дэлэгээссийэлэр аара Бүлүүгэ тохтоон хонон ааһыахтара. Быйылгы ыһыахха уопсайа тоҕус күрэхтэһии баар буолуоҕа. Балаһыанньаҕа кыра уларыйыы баар. Ол курдук, Аммаҕа ыытыллыбыт ыһыахха тимир уустарын куонкуруһа маҥнайгытын ыытыллыбыт буолан, уопсай суокка аахсыллыбатаҕа. Оттон быйыл киириэҕэ. Боотурдар оонньууларын икки бөлөххө арааран: 70 киилэҕэ диэри ыйааһыннаахтарга “Урааҥхай Уолан” сахалыы многоборье, 70 киилэттэн үөһээ ыйааһыннаахтарга “Эр Бэрдэ” абсолютнай чемпионат ыытыллыахтара. Бу икки көрүҥ аайы хамаандаттан биирдии киһи киирэн кыттар. Маны тыһанан, баҕалаах дьоҥҥо мас тардыһыытыгар, хапсаҕайга уонна гиирэ анньыытыгар күрэхтэһии тэрийиэхтэрэ.
Хамаандалары үс бөлөххө: 1. Киин оройуоннар; 2. Хоту оройуоннар; 3. Уопсастыбаннай түмсүүлэр диэн арахсаллар. Үгэс быһыытынан кыайыылаах икки улуус хамаандалара саҥа массыынанан «дьиэлиэхтэрэ». Быйыл даҕаны сүрүн бириискэ икки массыына турар (биирин Ыччат министиэристибэтэ, иккиһин улуус дьаһалтата уйуналлар). Ол туһунан Миирнэй оройуонун ыччатын кэмитиэтин бэрэссэдээтэлэ Алексей Болотин маннык эттэ: «Дьокуускай куораттан Миирнэйгэ диэри тыһыынчаттан тахса биэрэстэ. Онуоха диэри уонна төттөрү массыынаны сүүрдэн илтэхпитинэ саҥа тиэхиньикэ аатыттан ааһар. Ол иһин, биһиги билигин массыына атыылаһар сертификаты туттарар туһунан толкуйдуу сылдьабыт. Атын куонкурустарга эмиэ сыаналаах бириистэр баар буолуохтара. Ыһыах ыытыллар сирэ киэҥэ суох буолан, тэрээһиннэр аҕыйах хаамыылаах сиргэ ыытыллыахтара. Ыһыах сүрүн тиэмэтэ — норуоттар доҕордоһуулара. Онно анаан анал былаһаакка оҥорон араас омук култууратын көрдөрөр ассамблея тэрийиэхпит. Сайын биһиги куораппытыгар эдэр дьон бары кэлиҥ, сылдьыҥ, Ыччат ыһыаҕар көхтөөх кыттыыны ылыҥ диэн ыҥырабыт».
Ыһыах балаһыанньата манна баар.
2016 сыллаахха Аммаҕа буолбут Ыччат ыһыаҕын кыайыылаахтара, хаартыска, видео.
Станислав ИОВЛЕВ, «Саха сирэ» хаһыат, www.edersaas.ru