MILSET үөрэнээччилэр чинчийэр быыстапкалара салҕанар

Ааптар: 
Бөлөххө киир:

Бэҕэһээ, бүгүн “Триумф” киэҥ уораҕайыгар MILSET Vostok Expo-Sciences оҕолор уонна ыччаттар чинчийэр быыстапкалара буола турар. Быыстапкаҕа Арассыыйаны сэргэ Мексикаттан, Италияттан, Казахстантан кытталлар. Барыта 5 хайысханан барар. 

edersaas.ru

Быыстапка аһаҕас буолан, оҕолор бырайыактарын экспертэри сэргэ, олохтоохторго, бэйэлэрин  саастыылаах оҕолоругар барыларыгар кэпсииллэр. Быыстапка координатора Наталья Леонтович иһитиннэрбитинэн, 94 оҕо кыттыбыт. Итинтэн 63-һэ олохтоохтор. Мексикаттан икки, Италияттан үс (технология), Казахстантан биэс кыттааччы (естественнэй наукалар) кэлбит. Үгүстэр естественнэй наука уонна искусство хайысхатыгар кытталлар эбит.

Сунтаардааҕы Политехническэй лиссиэй-интэринээт 9-с кылааһын үөрэнээччитэ Ира Константинова бэйэтэ туоһунан оҥорбут жалюзитынан кыттар. Лиссиэйигэр А.А.Попова салалтатынан “Береста” куруһуогар дьарыктаммыта үс сыл буолбут.

Барыта дьиҥнээх матырыйааллары туһанным. Холобура, туос, тирии, сиэл, алтан. Тириини, дьиҥэр, искусственнайынан солбуйаары гыммытым эрээри, килиэй быһа сиэн кэбиһэр этэ. Ол иһин туһамматым. Бу жалюзины биэс ый оҥордум”, — диэн кэпсиир.

Оттон Чурапчытааҕы гимназия 8-с кылааһын үөрэнээччитэ Ньургун Семенов (салайааччы И.В.Сивцев) насос станциятын автономнай моделин оҥорбут. Биир үтүө күн оҕолору станциялар хайдах үлэлииллэрин көрдөрө илдьибиттэр. “Дьон үлэтэ ыараханын көбүппүт. Ол иһин станция моделин оҥорорго санаммыппыт. Бу, бастатан туран, энергияны кэмчилиир, иккиһинэн, өрүс эбэтэр күөл аттыгар туттахпытына ууну хачайдыыра судургутуйар, уу таһар массыына ирдэммэт буолар”, — диэн кэпсиир.

Ньургун миэхэ станцията хайдах үлэлиирин көрдөрөр. Бу тэрилбит уута аҕыйатааҕыта, сигнал баран, уутун хачайдаан ылар эбит. Аны тарбах саҕа экраҥҥа уута төһө үрдүккэ тиийбитин, объемун барытын көрдөрө турар.

Азиат хааннаах кыыска чугаһааппын кытта: “Давайте, я вам расскажу”, — дии-дии үөрэ-көтө көрсөр. Кэпсэтэн билбитим, Айаана Дарханова диэн Бурятияттан сылдьар оҕо эбит. Кини “Умхей” диэн ааттаах минераллаах уулаах дьүүктэни чинчийбит.  “Дьүүктэ бэйэтэ Байкал күөл хотугулуу-илин өттүгэр баар, Улан-Удэттэн 520 км. Үлэм сыалынан бу дьүүктэ уутун химическэй састаабын уонна туохха туһалааҕын чинчийии буолар. Итини барытын үөрэттим уонна ис-үөс ыарыыларын эмтиир эбит диэн түмүккэ кэллим”, — диэн кэпсиир.

Аллайыаха улууһун Оленегорскай оскуолатын үөрэнээччитэ Гульнара Горохова (салайааччы Т.В.Лебедева) балыгынан эмтэнии ньымаларын үөрэппит. “Холобура, сордоҥ өрөҕөтө — быарга, төбөтө хатарыллан баран үлтүрүтүллүбүт бороһуога – хабахха, үөһэ – күөмэйгэ, хатырыга – сүһүөххэ туһалаах”, — диэн чинчийтиин үллэстэр.

Людмила ПОПОВА, “Саха сирэ” хаһыат, edersaas.ru

Андрей СОРОКИН (СИА) уонна ааптар хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0