Атырдьах ыйыгар “Сосновый Бор” лааҕырга 317 оҕо сынньанан, бэйэлэрин инженернэй бырайыактарын, идиэйэлэрин олоххо киллэрэргэ үөрэннилэр. Манна атырдьах ыйын 25 күнүгэр “Мин — инженербин!” диэн Уһук Илиннээҕи куонкурус түмүктэннэ. Кыайыылаахтар ааттарын быһаардылар. Түмүгү таһаарыыга Федерация Сэбиэтин чилиэнэ Вячеслав Штыров ыалдьыттаата. Кини бу куонкуруһу өйүүр уонна бириистэри туруорар.
“Будущий инженер” номинацияҕа кыайыылааҕынан ааттаннылар:
1-кы миэстэ – Татьяна Скворцова, Дьокуускай к. 26 № -дээх оскуолатын “10 а” кылааһын үөрэнээччитэ. Кини “Буровая установка нового типа, работающая на эффекте Мейснера” диэн үлэлээх, ньиэби хостооһун сыанатын чэпчэтэр сыаллаах. “Айфон” төлөпүөнүнэн наҕараадаланна. Таня Бауман аатынан МГТУ-га номнуо ыҥырыллыбыт, бырайыага «Роснефть» хампаанньаҕа олоххо киирэр чинчилээх.
2-с миэстэ – Кирилл Филиппов уонна Тимур Петров, Саха политехническэй лицей “8 а” кылааһын үөрэнээччилэрэ. Кинилэр “Разработка и исследование средства передвижения для людей с ограниченными возможностями, адаптированное к городским условиям на базе гироскутера” үлэни оҥорбуттар.
3-с миэстэ – Валентин Егоров, Сунтаар улууһун Түбэй орто оскуолатын 10 кылааһын үөрэнээччитэ. Кини вездеход-матасыыкылы оҥорбут.
Вячеслав Штыров оҕолор үлэлэрин хайҕаата. Маннык куонкурустар оҕолор инженернэй дьыалаҕа интэриэстэрин көҕүлүүргэ, сайыннарарга олус туһалаахтарын ыйда.
Үөрэх, наука миниистирэ Владимир Егоров вездеход-матасыыкылы оҥорбут Валентин Егоров үлэтин хайҕаата. Бу матасыыкыл номнуо оҥоһуллан, хаһаайынын булбут, туһанылла сылдьар эбит. Онон куонкуруска кыттыбыт оҕолор үөрэхтэрин бүтэрэн, үрдүк квалификациялаах исписэлиистэр буолан кэлэн, өрөспүүбүлүкэ, дойду сайдыытыгар үлэлэһиэхтэрэ диэн кини эрэнэрин биллэрдэ.
Үөрэх министиэристибэтэ хамаандалар лидердэрин уонна кыайыылаахтары “Океан” лааҕырга баран сынньанар путевканан наҕараадалаата.
Ангелина Васильева, “Саха сирэ” хаһыат, edersaas.ru
Ольга Старостина түһэриитэ.