Биллэрин курдук, сөмөлүөккэ көтүүгэ үксүгэр сүрэх-тымыр ыарыылаах дьон көтөр аал түһэригэр уонна тахсарыгар доруобуйаларын туруга мөлтүүр.
Муус устар 1 күнүгэр Внуково аэропортан Дьокуускайга диэри ЯК 478 рейси оҥорбут сөмөлүөккэ биир пассажир чүөчэ туруга мөлтөөбүтүн бортпроводница бэлиэтии көрбүтэ. Бортпроводницаҕа ирдэниллэр быраабыла быһыытынан, кини сөмөлүөт иһигэр бастакы суһал көмөнү оҥоруон сөптөөх дьоннор баалларын-суохтарын ыйыппыта. Дьолго, СӨ доруобуйа харыстабылын миниистирэ Михаил Охлопков уонна искэни эмтиир өрөспүүбүлүкэтээҕи диспансер поликлиникатын отделениетын онкохирура Татьяна Васильева баар буолан биэрбиттэрэ. Эмсэҕэлээбит киһи сотору-сотору өйүн сүтэрэр тииһигэ киирэр буолан, кинини уон тыһыынча килэмиэтир үрдүккэ көтүү устатын тухары кэтээн көрбүттэрэ уонна суһал көмөнү оҥорбуттара.
Сөмөлүөт Дьокуускай аэропордугар түһээтин кытары ыарыһаҕы «Суһал көмө» биригээдэтэ Өрөспүүбүлүкэтээҕи 2 №-дээх балыыһа—Суһал медицинскэй көмө киинигэр аҕалбыттара.
«Хас биирдии эмчит идэлээх киһи күн аайы уонунан киһи олоҕун быыһыыр. Соҕотоҕун эбэтэр бүтүн хамаанданан бэйэбит ытык иэспитин толоро сылдьабыт. Мин бэйэбин дьоруойунан ааҕыммаппын. Миигин кытары көтөн испит эмчиккэ уонна алдьархайга ээл-дээл сыһыаннаспатах пассажирдарга махталбын биллэрэбин. Ураты махталбын сэргэхтэрин көрдөрбүт, ыарыһаҕы быыһыырга биһиэхэ тус бэйэлэринэн көмөлөспүт бортпроводницаларга тиэрдэбин»,
– диэн миниистир Михаил Охлопков санаатын үллэһиннэ.
х х х
Боинг 737 сөмөлүөт экипаһа: салгын суудунатын хамандыыра Георгий Борисов, иккис пилот Валериан Иванов, ыстаарсай бортпроводник Валентина Фомина, бортпроводниктар Виктория Иванова уонна Анастасия Жаркова сатабыллаах уонна сөптөөх дьаһаллары бириэмэтигэр оҥорбуттарын түмүгэр сөмөлүөт атын аэропорка түһэргэ күһэллибэтэ. Маннык ыксаллаах түбэлтэлэргэ эмчиттэр эбэтэр бортпроводница быһаарыыларынан, суһаллык атын сиргэ түһэр түгэннэр элбэхтэр.
Сөмөлүөт иһигэр хаһан баҕарар ыксаллаах түгэннэр үөскүөхтэрин сөп. Онуоха сөмөлүөккэ бастакы көмөнү оҥорор медицинскэй комплект (ол иһигэр кислородтаах боллуон уонна ингаляциялыыр мааскалаах) мэлдьи баар буолар. «Якутия» бортпроводниктара икки сылга биирдэ медицинскэй билиилэрин үрдэтэр куурустарга үөрэнэллэр. Бэл, оҕону төрөтүү ньымаларын эмиэ билэллэрэ ирдэнэр.
Манна даҕатан эттэххэ, РФ доруобуйа харыстабылын миниистирэ Вероника Скворцова эмиэ былырыын Нью-Йорка көтөн иһэн, сөмөлүөккэ эмискэ өйүн сүтэрбит дьахтары быыһаан турар. Миниистир бэйэтин хамаандатын кытары чаас аҥаарын устата бастакы көмөнү оҥорбуттар. В.Скворцова эппитинэн, кини уопсастыбаннай тырааныспарга номнуо төрдүс дуу, бэһис дуу төгүлүн суһал көмөнү оҥорбут. Бу сырыыга киниэхэ Арассыыйа премьер-миниистирэ Дмитрий Медведев махталын биллэрбитэ.
Надежда ЕГОРОВА, «Саха сирэ» хаһыат, edersaas.ru