Миниистир Сахамин Афанасьев бадарааҥҥа кубулуйбут өрүһү хонтуруолга ылла
«Бэҕэһээ туох ааттаах улахан алдьархай буолла. Бэйэм Таас Үрэх аттыгар ваахтанан үлэлиир киһи суруйабын. Ол курдук 20.06.2017 чыыһылаҕа Таас Үрэх сэлиэнньэ олохтоох дьонун иһэр уутун нефтяниктар ньиэптэрин таһаараарылар киртиттилэр. Бу үрэх Улахан Ботуобуйаҕа түһэр. Улахан Ботуобуйа, биллэрин курдук, Чернышевскайынан Бүлүү өрүһүгэр түһэр, иэдээн туох баар промышленнай отходтарынан Бүлүү Эбэҕэ куталлар, маны Ким хонтуруоллуур?», — диэн иһитиннэрии батсаабынан тарҕанан, үгүс киһини аймаата.
Бадарааҥҥа кубулуйбут өрүс хаартыскатын ыытаннар, дьэ, СӨ Айылҕа харыстабылын миниистирэ Сахамин Афанасьев быһаарсыах буолла.
Барыллааһын быһыытынан, өрүһү «РНГ» хампаанньа киртиппит. Хампаанньа бэрэстэбиитэллэрэ иһитиннэрбиттэринэн, Таас Үрэх сэлиэнньэтин аттыгар баар лицензионнай учаастакка үлэ ыытылла турар. Миниистир иһитиннэрбитинэн, үөскээбит быһыыны-майгыны быһаарса Айылҕа харыстабылын Мииринэйдээҕи уонна Ленскэйдээҕи кэмитиэтин иниспиэктэрдэрэ барбыттар. Билигин уу туохтан киртийбитин уонна төһө хоромньу тахсыбытын быһаара сылдьаллар.
Анивера АКИМОВА,»Саха сирэ» хаһыат, edersaas.ru
+1
+1
+1
+1
+1
+1
+1