Бүлүү умнаһын улуустарын диэки ыраах айаҥҥа туруннахха, аара суолга тохтоон аччыктаабыты аһатар, тоҥмуту ириэрэр итии астаах, үүттээх чэйдээх чайной арааһа элбэх. Мин бүгүн биир оннук айан дьонун аһатар Ньурба Маарыгар баар «Айаана» диэн кафе эдэркээн хаһаайкатын туһунан кэпсиэхпин баҕарабын. Иванна Попова 2013 с. дьиэ кэргэнин кытта федеральнай айан суолун кытыытыгар, «Туймаада-ньиэп» заправкатын кытта кэккэлэһэ кафе арыйан үлэлэтэллэр.
edersaas.ru
Ааһан иһэр айан дьонун дьиэтээҕи сахалыы аһынан: ис миининэн, сылгы хартатынан, хаанынан, собонон күндүлүүллэр, кыһыҥҥы өртүгэр убаһа тоҥ этин, кыһыллар балык остуолга уураллар.
Иванна Дьокуускайга үп-харчы, экономика колледжыгар тус сыаллаах миэстэҕэ үөрэммит буолан, үлэҕэ киириэхтээх сиригэр, казначействоҕа үлэһит ахсаанын сарбыйыы тахсан, ылбатахтар. Куоратынан, Ньурбанан резюме ыыта сатаан баран идэтинэн үлэ булбакка дойдутугар тиийэн, урбаанынан дьарыктанарга санаммыт. Быраата тутар бааһынай хаһаайыстыбатын сылгытын, сибиинньэтин, кууруссатын, козатын этин, сымыытын, үүтүн барытын чайнойга ас астыырга, шашлык оҥорорго тутталлар. Инникитин переработка сыаҕын арыйан, эт эрийэн, бэлимиэн, кэтилиэт, тиэптэл о.д.а оҥорор санаалаахтар.
«Биһиги үлэбит дьыл кэмиттэн, суол аһылларыттан-сабылларыттан улахан тутулуктаах, 12 ыйтан ортотунан 8-9 ый үлэлиибит. Аны бүддьүөт үлэһиттэрэ уоппускаҕа бардахтарына бүтэһик үс ыйдааҕы хамнастарын биэрэллэр. Мин чайнойум үлэлээбэккэ турар кэмигэр ким миэхэ уоппуска харчытын төлүөй?
Ол иһин ити өртүгэр кафеҕа дьон төһө сылдьарыттан хайдах хамнастанарбыт улахан тутулуктаах. Араас ыарахаттар бааллар эрээри, киһи бэйэтин туһугар чааһынай урбааҥҥа үлэлээбитэ быдан ордук. Биһиги аймахтарбыт үксэ урбаанынан дьарыктаналлар, ким таҥас, сибэкки атыылыыр маҕаһыыннаахтар. Онон, бэйэ-бэйэбитин өйөһөбүт”, — диэн кэпсиир чайной хаһаайката.
Кэпсэтиибит түмүгэр, мин бу отуччатын да туола илик эдэркээн, ол эрээри, олоххо номнуо туһунан көрүүлээх, үлэ суох диэн олорбокко бэйэтэ сүүрэн-көтөн кафе арыйан, урбаанынан дьарыктанар, бэлэми кэтэспэккэ баар кыһалҕаны быһааран иһэр хорсун санаалаах кыыһы ытыктыы көрдүм. Ол диэки айаннаан иһэн Ньурба Маарыгар «Айаана» диэн сахалыы сылаас астаах чайнойу көрдөххүтүнэ, тохтоон, итиигэ утаҕы ханнарар сөрүүн быырпаҕы, убаһа этин, ыһаарыламмыт собону, эмис эттээх соркуойу, минньигэс шашлык амсайан, күүс-уох эбинээриҥ дуу.
Марианна ТЫРТЫКОВА, «Саха сирэ» хаһыат, edersaas.ru