Бүгүн, балаҕан ыйын 14-гэр, Минскэйгэ, Спорт дыбарыаһыгар Олимпийскай оонньуулар үс төгүллээх чөмпүйүөннэрэ Александр Васильевич Медведь бирииһигэр көҥүл тустууга үгэс буолбут норуоттар икки ардыларынааҕы турнир саҕаланар. Бастакы күн көбүөргэ 57, 65, 74, 86, 97 кг диэри ыйааһыҥҥа тустар бөҕөстөр тахсыахтара.
edersaas.ru
Бу улахан түһүлгэҕэ Белоруссия хамаандатыттан икки саха бөҕөһө кыттар – 57 киилэҕэ Владислав Андреев уонна 65 киилэҕэ Ньургун Скрябин. Бэҕэһээ ыытыллыбыт сэрэбиэйдэһии түмүгүнэн, Европа хас да төгүллээх призера Владислав Андреев бастакы эргииргэ Македонияттан кыттар биир дойдулааҕа Владимир Егоровы кытта тустуоҕа. Онно хоттоҕуна, Михаил Иванов (Саха-Москва) — Георгий Эдишерашвили (Грузия) хапсыһыыларын кыайыылааҕын кытта күөн көрсүөҕэ..
Ньургун Скрябин финал чиэппэригэр Нургази Абдуразаков (Кыргызстан) — Алибеггаджи Эмеев (Арассыыйа) көрсүһүүлэрин кыайыылааҕын кэтэһиэҕэ. Манна Ньургуну утары, бука, 2013 с. Арассыыйа призера, 2014 с. Ярыгин турнирын финалиһа Эмеев тахсыаҕын экспертэр сылыктыыллар.
Бу турнир түмүгүнэн аан дойду чөмпүйэнээтигэр кыттар Белоруссия хамаандата сүүмэрдэниэҕэ.
Күрэхтэһии бүгүн Дьокуускай бириэмэтинэн киэһэ 17-00 чаастан саҕаланыаҕа.
Роман Попов, edersaas.ru
Хаартыска Интэриниэттэн ылылынна.