“Мир” каартаҕа көһүү саҕаланна

Бөлөххө киир:

От ыйын 1 күнүттэн Арассыыйа бары биэнсийэлээхтэрэ, устудьуоннар уонна бүддьүөт үлэһиттэрэ хамнастарын, биэнсийэлэрин, истипиэндьийэлэрин, социальнай төлөбүрдэрин “Мир” каартаҕа ылар буоллулар.

edersaas.ru


“Мир” каартаны аан дойдутааҕы экэниэмикэ көстүүлэриттэн, кириисистэн, санкциялартан тутулуга суох буолар туһуттан айбыттара.  Холобур, 2014 сыллаахха санкция туһуттан Visa уонна  MasterCard каарталаах сүүһүнэн тыһыынча киһи кыһалҕаны көрсүбүттэрэ.

Саҥа каартаҕа хайдах көһөрүөхтэрэй? Көһөрүү тута буолбакка, түһүмэҕинэн барыаҕа. Судаарыстыбаннай сулууспалаахтар, учууталлар, быраастар, атын да бүддьүөт үлэһиттэрэ сыл устата бу каартаҕа сыыйа көһүөхтэрэ. Ким баҕалаах барыта бу каартаны бааҥҥа оҥорторон ылан, туһаныан сөп. Оттон баҕарбат киһи, хамнаһын илиитигэр эбэтэр баан счетугар түһэртэрэн ылар кыахтаах.

Бу каартанан Интэриниэккэ эмиэ төлөһүөххэ сөп. Коммунальнай өҥөнү төлүөххэ, маҕаһыыннартан да атыылаһыахха сөп. Холобур, киэҥник биллэр “Али-экспресс” портал “Мир” каартаны ылар. Онлайн-төлөбүрдэр MirAccept технологиянан көмүскэллээхтэр. СМС иһитиннэрии нөҥүө код нүөмэрэ кэлэр, ону киллэрдэххэ эрэ, каартаттан устар. Ону тэҥэ кыраныысса таһыгар эмиэ туттуохха сөп.

“Кэшбэк” диэн өҥө баар, ол аата төлөөбүккүттэн 10-15%-на аныгыс атыыгыттан бэйэҕэр төннөн кэлэр. Бу өҥө күһүҥҥүттэн киириэхтээх. Инникитин “Мир” каартанан туһаныы өссө кэҥээн, сайдан иһиэхтээх.

Дойду бары сүрүн бааннара “Мир” карталары туһаныыга таһаардылар. Холобур, Сбербааҥҥа электроннай чибынан көмүскэллээх, мобильнай бааннаах каарта баар. Бу каартаны туһанарга сылга 750 солк. төлүүгүн (эһиилиттэн 450 солк. буолар). Сбербаан “Спасибо” бырагырааматыгар киирсэр, ол аата атыыласпыт суумаҕыттан 0,5%-на, партнердартан (холобур, Sela, “Роснефть”) 10%-на бэйэҕэр төннөр. Оттон биэнсийэлээхтэр каартаны босхо туһаныахтара.

Саха сиригэр бу каартаны номнуо туһанан эрэллэр. Бөдөҥ бааннар бары уонна “Почта баан” “Мир” каартаны таһаардылар, терминаллары туруордулар. Билиҥҥи кэмҥэ дойду үрдүнэн каарта ахсаана 10 мөлүйүөнтэн таҕыста.

Ангелина ВАСИЛЬЕВА, “Саха сирэ” хаһыат, edersaas.ru 

+1
0
+1
0
+1
0
+1
0
+1
0
+1
0
+1
0