“АЛРОСА” АК “Мир” руднигын шахтатыгар быыһааччылар бөлөхтөрө 8 киһини көрдүү сылдьар. Симиэнэнэн биэстии, сэттэлии киһилээх бөлөх үлэлиир. Итини тэҥэ, быыһааччыларга шахтаны үчүгэйдик билэр-көрөр рудник исписэлиистэрэ көмөлөһөллөр, кинилэри кытта бииргэ сылдьан, вентиляция систиэмэтин оҥороллор, шахта иһинээҕи салгын боруобатын ылан, гаас баарын-суоҕун быһаараллар.
Биир симиэнэ, ортотунан, шахта иһигэр 5-6 чаас үлэлиир. Ити кэнниттэн кинилэри солбуйаллар. Билигин шахта иһиттэн буордаах ууну таһаарыы үлэтэ күүскэ барар. Ону атыннык пульпа дииллэр. Дьону көрдөөһүҥҥэ, дьиҥэр, водолазниктар көмөлөһүөхтээхтэр эбит даҕаны, шахта иһэ көннөрү уу буолбакка, буордаах уу буолан, кинилэр хайдах даҕаны сылдьар кыахтара суох. Билигин шахтаҕа барыта 332 киһи уонна 34 анал тиэхиньикэ үлэлиир.
Бэҕэһээ “АЛРОСА” АК президенэ Сергей Иванов шахтаҕа билигин да көрдүү сылдьар оробуочайдар чугас дьоннорун, кэргэттэрин кытта көрсөн кэпсэппит, баар балаһыанньаны билиһиннэрбит.
“Бэҕэһээ биир киһини өрүһүйбүппүт эрэли үөскэтэр. Рудникка билигин да ыарахан балаһыанньа, уу киирэ турарыттан көрдөөһүн хаамыыта уларыйа турар. Дьону көрдүүргэ тэрил барыта баар. Быыһааччылар, төһө кыалларынан, шахтердар баар сирдэригэр тиийэ сатыахтара. Рудник уопуттаах исписэлиистэрэ баҕа өттүнэн көмөҕө кэллилэр. Кинилэр, биллэн турар, шахта иһин биэс тарбахтарын курдук үчүгэйдик билэллэр”, — диэн баар балаһыанньаны билиһиннэрдэ.
Александр ТАРАСОВ, «Саха сирэ» хаһыат, edersaas.ru