close
«Мобильнай баан» өҥөтүн араарбакка, харчытын уордарбыт...
Бэрээдэк - Олох-дьаһах

«Мобильнай баан» өҥөтүн араарбакка, харчытын уордарбыт

Билигин үгүс дьон суотабай төлөпүөнүгэр «мобильнай баан» өҥөтүн холботторор. Дьиҥэр, сүрдээх туһалаах уонна көмөлөөх өҥө эрээри, сорох ардыгар омсолоох да буолуон сөп. 

edersaas.ru


Онно, биллэн турар, киһи эмиэ бэйэтин болҕомтото суоҕуттан киирэн биэрэр.

Ол курдук, Дьокуускай куорат федеральнай суутугар 27 саастаах дьахтар «уоруу» ыстатыйанан буруйданар холуобунай дьыалата көрүллэн бүппүт. Бу туһунан СӨ Борокуратууратын пресс-сулууспата иһитиннэрдэ.

Суут быһаарбытынан, 2014 сыл ыам ыйыгар биир киһи суотабай төлөпүөнүн сүтэрбит, ол төлөпүөнүн сим-каартатыгар «мобильнай баан» холбоно сылдьыбыт эбит. Онуоха бу киһи суотабай сибээс салонугар тиийэн, нүөмэрин хаттаан төннөрбөтөх, ити өҥөтүн араартарбатах.

Ол түмүгэр, 2016 сыл тохсунньу ыйыгар бу эдэр дьахтар ити нүөмэри ылбыт уонна урукку хаһаайын «мобильнай баанын» араартарбатаҕынан туһанан, 2016 сыл олунньу 12 күнүттэн кулун тутар 6 күнүгэр диэри кэмҥэ уопсайа 25.600 солк. харчыны устубут.

Суут кинини буруйдааҕынан билинэн, 1 сыл 6 ыйга көҥүлүн быһары усулуобунайынан ааҕан, 2 сыл тургутар болдьоххо уурбут.

Дьокуускай куорат борокуратуурата санатар: төлөпүөҥҥүт нүөмэрин уларытаргытыгар, бааҥҥа тиийэн, «мобильнай баан» өҥөтүн араартараргытын умнумаҥ!

Биһиги корр., «Саха сирэ» хаһыат, edersaas.ru

Хаартыска: интэриниэттэн

#бүгүн: 1
1
0

Сайт матырыйаалларын ааптар көҥүлэ суох ылар бобуллар.