Саахымат: Кыайыы Кубогын хаһаайына Гумар Моисеев

Ааптар: 
Бөлөххө киир:

Ыам ыйын өрөгөйдөөх күннэрин көрсө саахымакка “Кыайыы Кубога” өрөспүүбүлүкэтээҕи турниры ыытыы бэртээхэй үгэскэ кубулуйда. Маҥнай утаа сүүмэрдиир түһүмэххэ 60 саахыматчыт кыттыбыта. Бары күүстээхтэр кытыннылар диир сатаммата буолуо: маастардар Василий Васильев, Роман Ганжуров, Николай Макаров, Алексей Баишев, маастарга хандьыдааттар Максим Попов (Нам), Нариман Мустафин уо. д.а. араас төрүөтүнэн кыттыбатылар.

Ол да буоллар, 16 бастыҥ саахыматчыт син саамылаһан финал түһүмэҕэр таҕыста. Кинилэр ортолоругар үс маастары, аҕыс хандьыдааты сэргэ биэс бастакы разрядтаах баар. Маастар Владимир Таппыров 43-с миэстэлэнэн, финалга кыайан киирбэтэ. Санатар буоллахха, Владимир Мэндеич былырыыҥҥы Кубок биир дьоруойунан буолбута, финалга иккис миэстэлэммитэ.

Бастаан утаа финал 1/8-гар “үөһэ обоймаҕа” түбэспиттэр ночоотурдубут дии санаатылар: күүстээхтэр баһыйар үгүстэрэ тоҕо эрэ манна түбэспит. Ол оннугар “аллараа обоймаҕа” маастар Гумар Моисеевы сэргэ биир-икки эрэ дьоһун оонньооччуну бэлиэтиэххэ сөп. Ити эрээри күрэхтэһии атыны көрдөрдө. Сыл баһыгар-атаҕар биирдэ эмэ күрэхтэһэр буолан, Г.Моисеев хара ааныттан ыарырҕатта, маастарга хандьыдаат Александр Кравченконы “армагедоҥҥа” хараларынан оонньоон нэһиилэ тэҥнэһиини ылла. Салгыы маастар Семен Местниковы 2:0,, маастарга хандьыдаат Вячеслав Гаврильевы 3:1 ахсаанынан сабырыйан, финалга син этэҥҥэ тиийдэ.

“Үөһээлэртэн” маастар Д.Егоров маҥнай былырыыҥҥы Кубок хаһаайынын Павел Бекетовы этэҥҥэ ааһан баран, финал чиэппэригэр устудьуон Руслан Пахомовка түбэстэ. Маастар буолаары сылдьар эдэр уол уопуттаах маастары түргэн партияларга иккитэ субуруччу хотто.

Бу бөлөххө биллэр-көстөр оонньооччулар – саамай эдэр маастар, онус кылаас үөрэнээччитэ Айсен Местников уонна Нам улууһуттан маастарга хандьыдаат Ньургун Винокуров финал чиэппэригэр утарыта көрүстүлэр. Бу да сырыыга икки партиянан сөп буоллулар, ахсаан 0:2 нам ааттааҕын туһатыгар.

Финал аҥаарыгар Р.Пахомов уонна Нь. Винокуров оонньуулара дьон болҕомтотун тарта. Ол эрээри ХИФУ устудьуона үгэһинэн икки түргэн партияҕа утарсааччытын баһыйа тутта: ахсаан 1,5:0,5. Уол бу үс микро-матчка олус күүстээх утарсааччыларын иккилии эрэ партияҕа суһаллык хотуута үгүстэри сөхтөрдө.

Онон финалга өрөспүүбүлүкэ биэс төгүллээх чөмпүйүөнэ Г.Моисеев эдэр кэскиллээх саахыматчыт Р.Пахомовы утары оонньоото. Уонунан сыл мунньуллубут уопут дуу, биитэр эдэр эрчимэ дуу? Алта чаастаах уһун унньуктаах оонньуу сылаата да ханна барыай? Бастакы партия эйэ дэмнээхтик түмүктэннэ. Иккискэ Тромповскай дебютугар хараларынан Г. Моисеев күүстээх хардары оонньууну ылла. Кини икки ладьята уонна слона үрүҥнэр хоруолларын “һ” линияҕа хаайбыттарын кэннэ, Р. Пахомов бэринэргэ күһэлиннэ. Бу сырыыга уопут баһыйа тутта. Онон 2017 сыллааҕы Кыайыы Кубогын хаһаайынынан 52 саастаах маастар Гумар Моисеев буолла.

Афанасий Павлов, күрэхтэһии кылаабынай судьуйата, спорт бэтэрээнэ.

+1
0
+1
0
+1
0
+1
0
+1
0
+1
0
+1
0