Ааспыт нэдиэлэҕэ Москваҕа Арассыыйатааҕы үөрэнээччилэр хамсааһыннарын эрэгийиэннээҕи үлэһиттэрин сэминээр-мунньахтара буолан ааста. Тэрээһин кыттыылаахтара “Төлөннөөх сүрэх” диэн Бүтүн Арассыыйатааҕы уопсастыбаннай-судаарыстыбаннай көҕүлээһин лауреаттарын наҕараадалааһыҥҥа сырыттылар.
edersaas.ru
Наҕараадалааһын Арассыыйа Аармыйатын Киин академическай тыйаатырыгар буолла. “Төлөннөөх сүрэх” быйыл биэс сылын бэлиэтиир. Уопсайа, 1000 эдэр дьоруой наҕараадаҕа түһэриллибититтэн, 156 киһи туппут. Итинтэн тэрээһиҥҥэ 31 лауреат кэллэ. Саха сириттэн – үс лауреат. Ол курдук, Дьокуускай куорат 2-с №-дээх национальнай политехническэй оскуолатын 6-с кылааһын үөрэнээччитэ Харысхан Хобров. Харысхан былырыын сайын Ыһыах кэмигэр Үс Хатыҥҥа ууга тимирэн эрэр бэйэтин саастыы оҕону быыһаабыт. Кинини наҕараадаҕа “Юные якутяне” өрөспүүбүлүкэтээҕи ресурснай киин түһэрбитэ. Харысханы сэргэ киинэ мастарыскыайын тэрийбит Баатаҕайтан Александр Чириков уонна баһаартан дьону быыһаабыт Бүлүүттэн Конон Спиридонов туттулар. Оттон Арассыыйатааҕы үөрэнээччилэр хамсааһыннарын тирэх оскуолатын — В.П.Ларионов аатынан Майа (Мэҥэ Хаҥалас) оскуолатын 6-с кылааһын үөрэнээччитигэр Харысхана Аммосоваҕа наҕарааданы дойдутугар туттарыахтара.
Дойду эдэр хорсун дьонун Арассыыйа дьоруойдара, биллиилээх спортсменнар, уопсастыбаннай тэрилтэлэр салайааччылара уонна култуура диэйэтэллэрэ кэлэн эҕэрдэлээтилэр. Ол курдук, кинилэр кэккэлэригэр Арассыыйа дьоруойа, летчик-космонавт, үөрэнээччилэр хамсааһыннарын бэрэссэдээтэлэ Сергей Рязанскай уонна “Росдетцентр” дириэктэрэ, Арассыыйатааҕы үөрэнээччилэр хамсааһыннарын координационнай сэбиэтин эппиэттиир сэкирэтээрэ Алиса Крюкова, Арассыыйа ыччатын салайааччыта Роман Камаев бааллар. Ити туһунан “Юные якутяне” ресурснай киин саайта суруйар.
Людмила ПОПОВА, “Саха сирэ” хаһыат, edersaas.ru