Саха сиригэр православнай таҥара үөрэҕэ киллэриллибитэ 385 сылын, Сибиир уонна Америка Апостола Эҥиэнтэй Сибэтиитэл (Вениаминов) 220 сылын бэлиэтээһин чэрчитинэн, сэтинньи 1-5 күннэригэр дойду киин куоратыгар улахан тэрээһиннэр ыытыллыахтара.
edersaas.ru
Ол курдук, сэтинньи 2-3 күннэригэр Москватааҕы Духуобунай академия аччыгый саалатыгар аан дойду таһымнаах научнай-практическай конференция, Сибэтиэй Петр манастыырыгар фотограф Юрий Коковин быыстапката, Нерюнгритааҕы «Соловушка» хуор кэнсиэрэ буолуохтара. Оттон сэтинньи 4 күнүгэр Кириэмиллээҕи Успенскай Собуорга сахалыы тылынан таҥара сулууспата ыытыллыаҕа. Бу сулууспаҕа быһаччы кыттар киһи, Дьокуускайдааҕы уонна Ленскэйдээҕи епархия протоиерейа Павел Слепцов, Москваҕа барыан иннинэ маннык кэпсээтэ:
— Эҥиэнтэй Сибэтиитэл түөрт уонтан тахса сыл Аляскаҕа, Уһук Илиҥҥэ уонна Саха сиригэр Христос үөрэҕин тарҕатыыга үлэлээбитэ. Дьон итэҕэли бэйэтин төрөөбүт тылынан ылынара ордук тиийимтиэ буолар диэн, таҥара кинигэлэрин сахалыы тылбаастаппыта, сулууспаны сахалыы тылынан ыытыыны саҕалаабыта, сиэркэптэр истэринэн оскуолалары тэрийэн үөрэх-билии аанын арыйбыта. Сиэрдээх майгылаах, эйэҕэс сыһыаннаах Эҥиэнтэй аккыырайы саха дьоно олус ытыктаабыттара-таптаабыттара, «Халлааннааҕы аанньалбыт» диэн ааттаабыттара. Эҥиэнтэй Сибэтиитэл (Вениаминов) олоҕун тиһэх сылларыгар Русь сиэркэбин үрдүк баһылыгынан, Москва митрополитынан, анаммыта. Ол иһин кини 220 сылынан итинник дьоһун дьаһаллар тэрилиннилэр. Успенскай Собуорга литургияны Патриарх Кирилл ыытыаҕа, Үөһээ Бүлүүттэн иерей Михаил Иннокентьев биһикки онно сахалыы мэлииппэлэри ааҕыахпыт. Даҕатан эттэххэ, Москваҕа таҥара литургиятын сахалыы тылынан ыытыы бу үһүс төгүлэ буолар. Маҥнайгы сулууспа Сибэтиэй Синод быһаарыытынан итиэннэ Патриарх Алексий алгыһынан, 2002 с. Саха сирэ Россияҕа холбоспута 370 сылынан, иккис сулууспа патриарх Кирилл алгыһынан, 2007 с. Саха сирэ Россияҕа холбоспута уонна Дьокуускай куорат төрүттэммитэ 375 сылларынан Быыһааччы Христос храмыгар ыытыллыбыттара.
Раиса Сибирякова, “Саха сирэ” хаһыат, edersaas.ru .
Дьокуускайдааҕы уонна Ленскэйдээҕи епархия протоиерейа Павел СЛЕПЦОВ.