Москваҕа уонна Дьокуускайга евразийскай култуурунай киини тэрийиигэ этии киирдэ
Биллэрин курдук, кулун тутар 13 күнүгэр Россия Тас дойдуларга дьыалаларын миниистирэ Сергей Лавров евразийскай гуманитарнай бииргэ үлэлэһии боппуруостарыгар федерация субъектарын баһылыктарын кытта көрсүбүтэ.
Татьяна Маркова, «Саха сирэ» хаһыат, https://edersaas.ru/
Бу көрсүһүү, чуолаан, биһиги өрөспүүбүлүкэбит Ил Дархана Егор Борисов көҕүлээһининэн буолла. Ол курдук, евразийскай интеграциялааһын бэлиитикэтин өйөөн, ЮНЕСКО, МОК, о.д.а. өйөбүллэринэн, “Азия оҕолоро” спортивнай оонньуу, “Олоҥхо дойдута ЮНЕСКО шедеврдэрин көрсөр”, Олоҥхо Ыһыаҕа, “Хаарыан хампа…” театральнай бэстибээл курдук, норуоттар икки ардыларынааҕы бөдөҥ бырайыактары олоххо киллэрэр өрөспүүбүлүкэ Баһылыга Егор Борисов С.В.Лавровка суругунан этиитин өйөөн, РФ миниистирэ Евразия регионнарын икки ардыларыгар култуурунай интеграциялааһыҥҥа көхтөөхтүк ылсыбыт Татарстан, Алтай, Башкортостан, Хакасия уонна Саха Өрөспүүбүлүкэтин Баһылыктарын быһаччы ыҥыран, бу кэскиллээх хайысхаҕа үлэни салгыы сайыннарыыга ирэ-хоро сүбэлэстэ.
МИД Улахан особнягар барбыт бу көрсүһүүгэ СӨ Ил Дархана Егор Борисов 2017 сыл бүтүүтүгэр Москваҕа Регионнар икки ардыларынааҕы бастакы евразийскай форуму ыытарга итиэннэ РФ киин куоратыгар Москваҕа евразийскай култуура киинин тэрийэргэ, маны таһынан, Дьокуускайга Евразия норуоттарын эпостарын киинин тутарга диэн чопчу этиилэри киллэрдэ.
Миниистир Сергей Лавров бу этиилэр олоххо киирэллэригэр эрэнэрин биллэрдэ.
Сиһилии “Саха сирэ” хаһыат кэлэр нүөмэригэр ааҕаарыҥ.
Татьяна Маркова.