Бүгүн дойду киин куоратын метрополитеныгар “Уһук Илиҥҥи экспресс” диэн сүрэхтэммит пуойас тимир ыллыгынан айаннаата. Пуойас састаабыгар уон вагоннаах, итилэртэн биирдэстэрэ Уһук Илин биир регионугар ананна, диэн Арассыыйа Федерациятын Бэрэсидьиэнин иһинэн Саха Өрөспүүбүлүкэтин Бастайааннай бэрэстэбиитэлистибэтин пресс-сулууспата иһитиннэрдэ. Сэттис вагон Саха сирин аатын сүгэр. Тас өттүн айылҕа кэрэ көстүүтэ киэркэтэр, интерьеригэр өрөспүүбүлүкэ сүрүн бэлиэлэрэ көстөллөр.
Маннык ааттаах састаап былырыын метро Таганскай-Краснопресненскай линиятыттан айанын саҕалаабыта уонна мөлүйүөнтэн тахса киһини тиэйдэ. Билигин Уһук Илиҥҥи экспресс пассажирдары метро сүрүн утаҕынан –Кольцевойунан тиэйиэҕэ. Бу бырайыак Уһук Илин федеральнай уокурук уонна Москва метрополитенын көмөлөрүнэн үлэҕэ киирдэ.
Тус тиэмэҕэ анаммыт пуойас сырыытын үөрүүлээхтик арыйыы сиэригэр Арассыыйа вице-премьерэ, Арассыыйа Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев кытынна. Кини бу бырайыак дьоһун суолталааҕын бэлиэтээн туран, сүрүн сыалынан Москва олохтоохторугар уонна ыалдьыттарыгар Уһук Илин туһунан кэпсиир аналлааҕын эттэ.
“Уһук Илин – дойдубут биир кэрэ миэстэтэ. Бүгүн манна 1300 инвестбырайыак олоххо киирэр, дойдуга тардыллар тас дойду инвестициятын 30 бырыһыана Уһук Илиҥҥэ ананар. Манна социальнай инфраструктура саҥа эбийиэктэрэ тутуллаллар. «Уһук Илиҥҥи регион үлэлиэн баҕалаахтарга баҕалаах сиринэн буолуохтаах. Үлэ миэстэтэ Уһук Илиҥҥэ толору”, — диэтэ вице-премьер
Саха сирин Бастайааннай бэрэстэбиитэлин бастакы солбуйааччы Александр Сафронов, ахсынньы 3 күнүгэр аһыллыахтаах Уһук Илиҥҥи экспресс Москва ыалдьыттарын болҕомтотун тардыа диэн эрэнэр.
“Бу сырыыга экспресс эрдэ стартаата. Ити киин куоракка Уһук Илин тэрээһиннэрин ыытыыга нэһилиэнньэ интэриэһин тардар туһугар ыытылынна”, — диэтэ кини.
edersaas.ru