Сунтаар улууһун Кутана сэлиэнньэтигэр сонун тэрээһин буолан ааста. Былыр-былыргыттан олохтоохтору балыгынан аһатан олорор Сымалыыр күөллэригэр муҥхалаатылар уонна сибиэһэй балыгы сии-сии олоҥхо иһиттилэр.
edersaas.ru
Кутанаттан 10 килэмиэтирдээх сиргэ сытар Сымалыырга сүүсчэ киһи мустан муҥха бырааһынньыгын тэрийдилэр. Үөрэ-көтө, көхтөөхтүк үлэлээн, кэлбит киһи барыта биирдии куул балыктанан, өттүк харалаах, илии тутуурдаах төнүннэ.
Онтон киэһэ нэһилиэк дьоно сөбүлээн мустар Николай Иванов-Куола Учуутал балаҕаныгар кэллилэр. Манна Олоҥхо декадатын чэрчитинэн «Муҥха олоҥхото» диэн олоҥхо дьоро киэһэтэ ыытылынна. Аан бастаан ыытыллар маннык тэрээһини олонхо дьиэтин салайааччыта Мария Афанасьева, эдьиийдии-балыстыы Туйаара уонна Александра Андреевалар, Айсен Фёдоров көҕүлээтилэр. Олоҥхону Мария Павловна Афанасьева уһуйар оҕолоро, 4 кылаас үөрэнээччилэрэ, толордулар.
Муҥха уонна олоҥхо киэһэтин кыттыылаахтара саҥа муҥхаламмыт собо миинин иһэ-иһэ оҕолорун олоҥхотун истэн, астынан тарҕастылар.
ЫСПЫРААПКА:
Былыр балыгы күкүр охсон сытытан сииллэрин «сыма» диэн ааттыылларынан, байанайдаах күөл Сымалыыр дэммит буолуон сөп.
Сымалыыр уруккуттан өлгөм уонна минньигэс балыктааҕынан сураҕырар.
Кутаналар 60-тан тахса күөллээхтэриттэн Сымалыыр биир саамай улаханнара. Сымалыыр кэнниттэн Сүөдэр Уус Үҥкүрэ, Күһүт, Тыылаах уо.д.а. күөллэр кэлэллэр.
Надежда ЕГОРОВА, «Саха сирэ» хаһыат, edersaas.ru