Бүгүн Чурапчы улууһун Мугудай нэһилиэгин булчуттара иккис сылын нэһилиэктэрин дьонун кулууп дьиэҕэ мунньан, бырааһынньык тэрийбиттэрин туһунан сонун батсаабы толордо.
Елена ПОТОЦКАЯ, «Саха сирэ» хаһыат, https://edersaas.ru
Нэһилиэк ытык олохтооҕо, кырдьаҕастар сэбиэттэрин актыбыыһа Валентина Макарова бэлиэтээбитинэн, бүгүн мугудайдар үс бырааһынньыгы тэҥҥэ бэлиэтээтилэр: Ньукуолун чэчиэринньигин, булт сезона түмүктэммитин уонна Ырыа күнүн.
—Барыта 100-тэн тахса киһи мустан, кус уонна балык сиэн, сылаас миин иһэн, ол олорон өссө кэнсиэр көрөн, бэртээхэй бырааһынньык буолла. Былырыын ыччаттарбыт 40-тан тахса куһу аҕалан буһартарбыттара. Быйыл куспут ахсаана элбээн, 50-тан тахсан, күөскэ баппакка, ордубут куспутун лотереяҕа туһанныбыт. Чаачыгыйга Аҕа дойду Улуу сэриитин кэмигэр Чурапчыттан көһөрүллүбүт дьоҥҥо анаан пааматынньык тутуутугар харчы хомуйдубут. Лотереяҕа аҕыс анды мончууга, ботуруон, илим, булт араас тэрилэ, сибиэһэй кус оонньонно, — диэн кэпсиир Валентина Макарова.
Былырыын мугудайдар»Булт сезонун түмүгэ» диэн бырааһынньыгы стадиоҥҥа тэрийбиттэр. Онно Савелий Попов уонна Тарас Оконешников аҕалбыт сибиэһэй соболорун амсайбыттара. Быйыл кинилэр үгэс быһыытынан балыгынан дьоннорун эмиэ күндүлээтилэр.
Быйыл тымныыта бэрт буолан, тэрээһини кулууп иһигэр оҥордулар. Бэртээхэй үгэһи салҕаан, «Булт сезонун түмүгэ» бырааһынньыгы мугудайдар быйыл өссө тупсаран биэрдилэр. Ол курдук, быйылгы булт сезона аһыллыытыгар нэһилиэктэрин эр дьонугар булка атаарыы сиэрин-туомун оҥорбуттар, кусчуттар дурдаланар күөллэринэн күрэхтэһиилэри тэрийбиттэр. «Маалла», «Буоратай», «Бахы Баалы», «Саадьаҕай» о.д.а. күөллэр хамаандалара булка сыһыаннаах күрэхтэһиилэргэ кыттыбыттар.
— Быйыл иккис сылбытын дьоммутун-сэргэбитин мунньан «Булт сезонун түмүгэ» бырааһынньыгы ыыттыбыт. Маннык тэрээһини ыытыы сүрүн соруга — нэһилиэк дьонун түмүү, сомоҕолооһун, бэйэ-бэйэни өйөһүү. Бу тэрээһини аҕалар, ыччаттар түмсүүлэрэ, «Сарыал» чөл олоҕу пропагандалыыр уопсастыбаннай тэрилтэ (сал. Радислав Катаков) тэрийэн ыытабыт. Биһиэхэ олохтоох дьаһалта, аҕа сүбэтиттэн Дмитрий Иванов, булчуттар түмсүүлэриттэн Константин Жирков, Илья Толстоухов, дьахталлар уонна кырдьаҕастар сэбиэттэрэ көмөлөһөллөр. Онон бары биир сүбэнэн сылдьабыт. Маннык биир санаалаах сылдьан, нэһилиэкпит олоҕор кыттарбыт наһаа үчүгэй, — диэн кэпсиир ыччат лиидэрэ Ярослав Лебедев.
Бүгүн Ырыа күнүнэн сибээстээн, баянын туппутунан сылдьар, бары тэрээһиннэри алыптаах муусуканан киэргэтэр нэһилиэк кулуубун баяниһа Иннокентий Аммосовы улуус култууратын Бочуоттаах кыраамататынан наҕараадалаабыттарын «Булт сезонун түмүгэ» бырааһынньыкка кэлбит дьон үөрэ-айхаллыы ытыс доҕуһуолунан айхаллаатылар.
Мугудайдар курдук бүгүн Чурапчы үгүс нэһилиэктэригэр аҕалар, булчуттар түмсүүлэрэ уонна ыччаттар ытык кырдьаҕастарга быйылгы бастакы куһу амсатан үөртүлэр. Холобура, бу хаартысканы Хатылыга бэтэрээннэргэ иккилии куһу түҥэттилэр диэн батсаапка ыыттыллар.
Ити курдук, үтүө үгэһи тэрийэн, Чурапчы улууһун Мугудайын эр дьоно өрөспүүбүлүкэ булчуттарыгар бэйэлэрин холобурдарынан: «Дьоммутун-сэргэбитин, ытык кырдьаҕастарбытын кытта Байанайбыт тосхойбутуттан үллэстиэҕиҥ, сомоҕоһуулаах буолуоҕуҥ!», — диэн бэртээхэй ыҥырыы оҥордулар. Үтүө дьыала батыһыннарыылааҕа чахчы!
Елена ПОТОЦКАЯ, «Саха сирэ» хаһыат, https://edersaas.ru