Саха сиригэр биллэриллибит Ыччат сылынан сибээстээн, маассабай спорду сайыннарар сыалтан Кэбээйи улууһун Сайылык бөһүөлэгэ тэриллибитэ 65 сылыгар анаммыт өрөспүүбүлүкэтээҕи волейбол күрэхтэһиитэ үрдүк таһымнаахтык буолан ааста.
Манна барыта 22 хамаанда: Дьокуускайтан кыргыттар, Үөһээ Бүлүү Кырыкыйыттан эр дьон уонна кыргыттар, Горнай улууһуттан Орто Суурт кыргыттара, Маҥарас уонна Бэс Күөлүн эр дьоно, Бүлүү улууһуттан уон хамаанда – Бүлүү куоратыттан эр дьон уонна кыргыттар, Хампаттан уонна Кыһыл Сыыртан эр дьон, Тыымпыттан уонна Бороҕонтон бэтэрээннэр, эр дьон уонна кыргыттар; Кэбээйи улууһуттан алта хамаанда – Мастаахтан бэтэрээннэр уонна эр дьон, Мукучуттан эр дьон, кыргыттар икки хамаандалара уонна бэтэрээннэр, уопсайа 184 спортсмен икки күннээх күүрүүлээх киирсиигэ кытынна.
Бастакы күҥҥэ күрэхтэһии үөрүүлээх аһыллыытыгар хамаандалар парааттара, Мукучу нэһилиэгин бэтэрээн волейболистарын чиэстээһин буолла. Алгыс тыллары нэһилиэк баһылыга Анна Ивановна Сысоева, “Дуоҕа Боотур” уопсастыбаннай тэрилтэ салайааччыта Николай Олегович Павлов уонна күрэхтэһии кылаабынай судьуйата, өрөспүүбүлүкэтээҕи категориялаах судьуйа, “СахаВА” бочуоттаах маастара Афанасий Эдуардович Кузьмин эттилэр. Сүүмэрдиир тыҥааһыннаах киирсиилэр икки сааланан ыытылыннылар. Кыргыттар – гимназия, эр дьон – ДЮСШ саалаларыгар күрэхтэстилэр.
Бастакы күн түмүктэниитигэр “Дайан” нэһилиэк сынньалаҥын киинигэр саха эстрадатын сулустара Святослав Эверстов, Егор Степанов уонна Мукучубут талааннаах ырыаһыттара кыттыылаах кэнсиэр буолла, ол кэннэ уоттаах-күөстээх дискотека ыытылынна.
Иккис күҥҥэ эбиэттэн киэһэ финальнай киирсиилэр быыстарыгар, киирии билиэтинэн сыаналаах бириис оонньонно. Булуу улууһун Тыымпытыттан кыттааччы саа сертификатын сүүйэн, үөрүүтэ үксээтэ.
Икки күннээх тыҥааһыннаах киирсии түмүгэ маннык буолла:
Кыргыттарга: 1. Бүлүү куорат, 2. Мукучу (Кэбээйи улууһа), 3. Дьокуускай.
Бэтэрээннэргэ: 1. Мукучу (Кэбээйи улууһа), 2. Бороҕон (Бүлүү улууһа), 3. Бүлүү куорат.
Эр дьоҥҥо: 1. Бүлүү куората, 2. Мукучу (Кэбээйи улууһа), 3. Бэс Күөлэ (Горнай улууһа).
Күрэхтэһии кэмигэр бэйэлэрин чаҕылхайдык көрдөрбүт спортсменнарга анал номинациялар туттарыныллылар. Кыайыылаахтар сыаналаах бириистэринэн наҕарааданаланнылар.
Кэлбит ыалдьыттар, кыттааччылар уонна тэрийээччилэр – бука бары спорт бырааһынньыгыттан астынан, дуоһуйан тарҕастылар. Тэрийээччи “Дуоҕа Боотур” түмсүү көмөлөспүт, күүс-көмө буолбут дьоҥҥо барҕа махталын тиэртэ.
Ханнык баҕарар спорт күрэхтэһиитэ биһирээччилээх, көрөөччүлээх буоллаҕына көхтөөх буолар. Спортсмен көрөөччү сэҥээриитигэр наадыйар. Ону барытын толорбут Мукучу дьонугар барҕа Махтал!!!
Ону таһынан “Дуоҕа Боотур” туох баар бары чилиэттэригэр, Саха сирин араас муннуктарыгар олорор уолаттарбытыгар күүс-көмө буолбуккутугар барҕа Махтал буоллун! Үтүө сыһыаҥҥыт сүүс төгүл эбиллэн бэйэҕитигэр эргилиннин, бар дьоммут!
Үлэбитигэр инники былааммыт элбэх, көхтөөх уопсастыбаннай үлэнэн дойдубут, норуоппут сайдарыгар төһүү күүс буолуохпут диэн эрэлбит улахан.
Александр КЫЧКИН уонна “Дуоҕа Боотур” түмсүү уолаттара.