Муммут дьону көрдүү Полярнайтан Сааскылаахха бөртөлүөт сарсыарда тиийэр буолла

Бөлөххө киир:

Анаабыр улууһунааҕы Биир кэлим дьуһуурунай диспетчерскэй сулууспа начаалынньыга Николай Тимофеевтыын «Саха сирэ» хаһыат суруналыыһа кэпсэтэ сырытта.

Онно Николай Афанасьевич Сааскылаахтан Үрүҥ Хайаҕа айаннаары муммут дьону көрдүүр үлэ хайдах ыытылларын маннык иһитиннэрдэ:

— Кэрэчээнэ Дьокуускайтан алтынньы 17 күнүгэр көтөн кэлбитин кэннэ, Туприннар сарсыныгар киэһэ хараҥаран эрдэҕинэ айаннаабыттара. Аҕата кыыһын ылаары Үрүҥ Хайаттан кэлбитэ. “Быһа барабыт”, — диэбит этэ. Онно өрүс туорааһыннаах буолан, сэрэхтээх. Билигин муус чараас. “Анаабыр алмаастара” хампаанньа бөртөлүөтэ алтынньы 19 уонна 20 күннэригэр тэрилтэ наадатыгар коммерческай көтүүлэри оҥорбута. Дьон муммута субуотаҕа эбиэттэн киэһээ биллибитэ. Ол иһин иккис күнүгэр таарыйа, муммут дьону көрдөөн, эргийэн кэлбитэ гынан баран, дьону көрбөтөх этилэр.

Билигин 12 киһи биэс биригээдэҕэ арахсан, 8 тиэхиньикэнэн (1 ГАЗ вездеход, 6 “Ямаха”, 1 “Буран”) көрдүү сылдьаллар. “Буран” суолун көрбүттэр дииллэр эрээри, туундараҕа балыксыттар, табаһыттар сылдьаллара элбэх буоллаҕа. Бүгүн “Анаабыр алмаастара” АУо генеральнай дириэктэрэ Павел Маринычев сөмөлүөтүнэн Дьокуускайтан көтөн кэлбитин бөртөлүөт Полярнайтан кэлэн, киэһэлик үргүлдьү Үрүҥ Хайаҕа илдьиэхтээх этэ. Ону сарсыарда сырдаабытын кэннэ көтүтээри, көрдөһөн, тохтоттубут. Сарсыарда 9 чааска Үрүҥ Хайаҕа бара таарыйа, муммут дьону көрдөөн, эмиэ эргийэн көтүөхтэрэ. Сарсын ЫБМ министиэристибэтиттэн (МЧС) 3 киһи кэлиэхтээх. Бөртөлүөт кэллэҕинэ “Анаабыр алмаастара” АУО кэрэһиининэн хааччыйыахтаах. Биһиги ЫБММ-гэр, Быыһыыр сулууспаҕа уонна бырабыыталыстыбаҕа сайаапка биэрэн олоробут.

— Көстөллөрүгэр төһө эрэллээххитий?

— Кэрэчээнэ аҕата тыаҕа сылдьа үөрүйэх киһи. Көлөлөрө алдьаммыт буоллаҕына, ханна эмит болоххо тохтообут буолуохтарын сөп. Биһиги дьоммут айаҥҥа үс хонукка аһыыр өйүөлээх сылдьааччылар. Онон астара бүтэн эрэрэ буолуо.  Куһаҕана, ууга былдьаммыт буолуохтарын эмиэ сөп. Тыыннаах, чэгиэн көстөллөрүгэр таҥараттан көрдөһөбүт.

Василий НИКИФОРОВ, edersaas.ru

P.S. Санатан эттэххэ, Кэрэчээнэ балта Кэскилээнэ Сааскылаахха бөртөлүөт ыытарга көрдөһөн өрөспүүбүлүкэ дьонугар Инстаграмынан сурук тарҕаппыта ( https://edersaas.ru/keskileene-tuprina-2/ ). Киэҥ сиринэн тайаан сытар улууска кэриччи көтөргө бөртөлүөт эрэ абырыыр кыахтаах…

+1
0
+1
0
+1
0
+1
0
+1
0
+1
0
+1
0