Саха сирин Ил Дархана Айсен Николаев Өлүөнэни туоратар муоста тутуута ыытыллыахтаах миэстэтигэр Табаҕа сэлиэнньэтигэр Саха сирин миниистирдэрин кэбиниэтин баһылыга Владимир Солодов, бырабыыталыстыба бэрэссэдээтэлин солбуйааччы Кирилл Бычков, Дьокуускай куорат баһылыга Сардаана Авксентьева кыттыылаах көһө сылдьар оробуочай мунньаҕы ыытта.
Өрөспүүбүлүкэ баһылыга Айсен Николаев мунньах кыттыылаахтарыгар бырайыагы түргэтэтэр боппуруостары быһаарарга сорудахтаата. Чуолаан, муостаҕа диэри тиэрдэр суоллары сөбүлэһиннэрэргэ уонна итини сири-уоту былааннааһын докумуонугар киллэрэргэ эттэ.
“Кэнники ыйдарга биһиги Өлүөнэ муостатын тутуу бырайыагар былаас федеральнай уорганнарын кытта күүскэ үлэлиибит, боппуруос оннуттан хамсаата диэххэ сөп”, — диэтэ Айсен Николаев.
Өрөспүүбүлүкэ баһылыга ахсынньы 12 күнүгэр Өлүөнэ муостатын тутуу боппуруоһа Арассыыйа Тырааныспарга министиэристибэтин научнай-тэхиньиичэскэй сэбиэтин мунньаҕар көрүллэрин туһунан иһитиннэрдэ. Санатан эттэххэ, бэрэсидьиэн Владимир Путин Саха сирин Ил Дархана Айсен Николаевы кытта атырдьах ыйынааҕы көрсүһүүтүгэр Арассыыйа тырааныспарга миниистирэ Евгений Дитриххэ уруккуттан дьүүллэһиллэр Өлүөнэни туоратар муоста тутуутун тиэмэтигэр эргиллэргэ уонна ити түмүктэрин туһунан иһитиннэрэригэр эппитэ.
Ол эрээри, Саха сирин Ил Дархана эппитин курдук, өрөспүүбүлүкэ таһымыгар быһаарыыны эрэйэр боппуруостар өссө да бааллар.
“Хомойуох иһин, өрөспүүбүлүкэҕэ кэнники сылларга бу тутуу туһунан элбэх кэпсэтии тахсыбыта, ол эрээри чопчу бырайыактааһын туһунан буолбатах. Эрдэ оҥоһуллубут бырайыак быһыытынан муостаҕа тиэрдэр суол Эргэ Табаҕанан ыытыллара сабаҕаламмыта уонна 150 учаастагы таарыйыахтааҕа. Билигин бырайыактааччылар манна сэлиэнньэ тас өттүнэн тиэрдэр суол барылын буллулар, ити түмүгэр 35-36 кэтэх учаастагы эрэ таарыйан ааһыахтааҕа. Бу барылы биһиги бүгүн сүрүнүнэн ылынныбыт”, — диэн Саха сирин Ил Дарханын уонна бырабыыталыстыбатын пресс-сулууспата Айсен Николаев этиитин тиэрдэр.
СИА-ттан Женни Стрюкова тылбаастаата.
edersaas.ru