Бүгүн, ыам ыйын 20 күнүгэр, Дьокуускай киин болуоссатыгар Мусуой аан дойдутааҕы күнүгэр анаммыт «Музейный пикник» диэн бырааһынньыктааҕы акция буолла. Тэрээһиҥҥэ куорат итиэннэ чугастааҕы улуустар мусуойдара кытыннылар.
Роман Попов, «Саха сирэ» хаһыат, www.edersaas.ru
Манна эдэр-эмэн дьоҥҥо араас интэриэһинэй дьаһаллар ыытылыннылар. Ол курдук, кырачааннар аспаалга уруһуйдаатылар, археологическай хаһыылар тустарынан элбэх саҥаны биллилэр, кумахтан былыргы үйэтээҕи таастары көрдүүргэ холоннулар, остуол оонньууларыгар күрэстэстилэр. Ким баҕалаах маастардар такайыыларынан иистэнэргэ, уруһуйдуурга, туойтан маллары, бэлэхтэри оҥорорго үөрэннилэр. Мусуойдар ураты экспонаттарын кэрэхсээтилэр, суруйааччылартан анабыл суруктаах саҥа кинигэлэрин атыыластылар, худуоһунньуктарга мэтириэттэрин уруһуйдаттылар, сүүйтэриитэ суох лотереяҕа оонньоон хартыыналар, искусствоҕа анаммыт бэртээхэй таһаарыылар хаһаайыннарынан буоллулар.
Муусуканы сөбүлээччилэр «Арко Артико» ансаамбыл, Муусука үрдүкү оскуолатын, Суорун Омоллоон аатынан Опера уонна балет тыйаатырын, судаарыстыбаннай циркэ, Эстрада тыйаатырын артыыстара, фольклор кэлэктииптэрэ, оҕо ансаамбыллара кыттыылаах кэнсиэртэри сэҥээрэн көрдүлэр.
Бырааһынньыктааҕы тэрээһиҥҥэ сылдьыбыттар кыралыын-улаханныын дуоһуйа сынньанан, элбэх саҥаны билэн тарҕастылар, тэрийээччилэргэ махтаннылар, инникитин маннык дьаһаллар үтүө үгэскэ кубулуйан сыллата ыытыллалларыгар баҕа санааларын эттилэр, култуура олоҕун биир дьоһун көстүүтүнэн буолуоҕар эрэнэллэрин биллэрдилэр.
Роман Попов, «Саха сирэ» хаһыат, www.edersaas.ru