Мусуой аһылынна, кинигэ сүрэхтэннэ

Бөлөххө киир:

Оҕону үөрэтэр уонна доруобуйаларын чэбдигирдэр М.И.Герасимов аатынан Сунтаардааҕы Лесной оскуола-интэринээт 1954 с. аһыллыбыта.

edersaas.ru

Оскуола бастакы дириэктэринэн Моисей Иванович Герасимов үлэлээбитэ. Кини тэрилтэ билигин турар миэстэтин талан, үөрэнэр куорпуһун туттарбыта. Ыһыллыы-тоҕуллуу саҕана оскуола-интэринээти саба сылдьыбыттара. Олохпут көнөн оннугар түспүтэ. Билигин манна алын кылаастарга барыта 54 оҕо үөрэнэ-үөрэнэ доруобуйатын көннөрүнэр. Сүрүннээн тыҥалара ыалдьар оҕолор сылдьаллар. Онон учууталлары сэргэ, 7 медицинскэй үлэһит баар. Дириэктэринэн соторутааҕыта Мария Бекренева ананна.

Лесной оскуолаҕа алтынньы 6 күнүгэр сэргэх тэрээһин буолан ааста. Ол курдук, бу күн оскуола-интэринээккэ 22 сыл устата иитээччинэн, дириэктэринэн үлэлээбит Николай Данилович Данилов аатынан мусуой хоһо аһылынна. Николай Данилович куруук хаартыскаҕа түһэрэр, киинэҕэ устар аппарааттарын илдьэ сылдьара. Ол иһин, мусуой үгүс экспонаттара – кини түһэрбит үлэлэрэ.

Үөрүүлээх тэрээһиҥҥэ Николай Данилов кыргыттара кэлэн кытыннылар. Аҕатын туһунан ахтыыны улахан кыыстара, Дьокуускайтан кэлэ сылдьар Дора Шишигина оҥордо.

Лесной оскуола хаһан аһыллыаҕыттан барыта 40 тыһыынча оҕо үөрэнэн, доруобуйатын көннөрүнэн тахсыбыт. Олор истэригэр өрөспүүбүлүкэҕэ биллэр дьон бааллар. Ол курдук, айар талааннаах Уйбаан Ороһуунускай, Альберт Бүлүүйүскэй, о.д.а.

Мусуойу үөрүүлээхтик аһыы кэнниттэн «Ахтар, саныыр Леснойум» диэн кинигэ сүрэхтэниитэ буолла. Тэрээһиҥҥэ улуустааҕы үөрэх управлениетын начаалынньыга Гаврил Еремеев кэлэн кытынна. Ону таһынан Лесной оскуолаҕа араас кэмҥэ үлэлээн ааспыт бэтэрээннэр, оскуола иитиллээччилэрэ кэлбиттэр.

Кинигэ тахсыытыгар үгүс сыратын 2002-2017 сылларга оскуола дириэктэринэн үтүө суобастаахтык үлэлээбит Лидия Дмитриевна Михайлова уурбут. Ол иһин, кини аатыгар үгүс киһи эҕэрдэ тылы эттэ. Н.Д.Данилов кыргыттара Лидия Дмитриевнаҕа махталларын, ытыктабылларын биллэрэн, уус аймахтара оҥорбут үрүҥ көмүс кольеларын бэлэхтээтилэр.

Кэнники сылларга оскуола материальнай-техническэй базата бөҕөргөөбүт. Иитиллээччилэр халлаан сылаас кэмигэр ыраас салгыҥҥа тахсан эрчиллэллэригэр тутуу арааһа баар. Оҕолору күҥҥэ хаста да битэмииннээх, сибиэһэй аһылыгынан аһаталлар. Ол иһин, оҕолор кылгас кэм иһигэр үтүөрэргэ бараллар. Оскуола кэлэктиибэ инникитигэр эрэллээх. Дьиҥэр, доруобуйаларынан хааччахтаах оҕолор аҕыйыылларыгар саамай интэриэстээх дьон кинилэр буоллаҕа.

Гаврил АНДРЕЕВ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0