Саха норуодунай бэйиэтэ В.М.Новиков-Күннүк Уурастыырап төрөөбүтэ 110 сылын көрсө «Күөх сааһы хайҕааммын, күн аннын таптааммын» диэн оскуола оҕолоругар хоһоон ааҕыытыгар күөн күрэс буолла.
— Уон ахсыс төгүлүн тэриллибит куонкурус Е.Ярославскай аатынан Хотугу норуоттар устуоруйаларын уонна култуураларын холбоһуктаах судаарыстыбаннай мусуойугар ыытылынна. Түһүлгэҕэ барыта 285 үөрэнээччи түмүстэ. Быйыл ордук элбэх оҕо Кэбээйи, Нам, Хаҥалас, Амма, Уус Алдан улуустарыттан кэллэ. Тэрээһин кыттыылаахтарыгар маҥнай В.М.Новиков-Күннүк Уурастыырап олоҕун, айар үлэтин туһунан быыстапка көрдөрүлүннэ. Бэйиэт суруйан хаалларбыт тэтэрээтин, кэппит таҥаһын-сабын, наҕараадаларын, докумуоннарын, дьиэ кэргэн архыыбыттан ылыллыбыт хаартыскалары улаханнык сэргээтилэр, сэҥээрдилэр, ыйытыылары да биэрдилэр, — диэн билиһиннэрдэ мусуой үлэһитэ Мария Пестрякова. Куонкурус сүрүн сыалынан хоһоон тылын-өһүн өйдөөн, ис дууһатыттан ааҕар оҕолору болҕомтоҕо ылыы, ыччаты тыл сүмэтигэр иитии буоларын эттэ.
Дьүүллүүр сүбэ чилиэттэрэ тыл-өс төһө чуолкайыгар, туттан-хаптан ааҕыыга болҕомтолорун уурбуттар. Тэрээһини «Сосновый бор» Оҕо доруобуйатын чэбдигирдэр киин, «Киэргэ», «Уран Саха» ювелирнай фирмалар, «Дисплей» көмпүүтэр маҕаһыынын тиһигэ, «Бичик» кинигэ кыһата, «Ректайм» хампаанньа өйөөбүттэр. Икки күннээх күрэс кэнниттэн кыайыылаахтары эҕэрдэлээбиттэр.
Бастакы бөлөххө соҕотоҕун ааҕааччыларга: 1 м. – Елизавета Степанова (Ньурба 1 №-дээх оскуолатын 4 «а» кылааһын үөрэнээччитэ. Сал. Д.Григорьева). 2 м. – Айсен Егоров (Кэбээйи, 2 кылаас үөрэнээччитэ. Сал. С.Кривошапкина). 3 м. – Сергей Прядезников (Уус Алдан, Курбуһах, 6 кыл. Сал. А.Прядезникова).
Бу бөлөххө кэлэктиибинэн ааҕыыга кыайыылааҕынан Уус Алдан улууһун Мүрү 1 № -дээх оскуолатын 4 «б» кылааһын оҕолоро (сал. Н.Портнягина) тахсыбыттар. Иккис миэстэҕэ саха-французскай лиссиэй үөрэнээччилэрэ (Хамаҕатта, Нам. Сал.В.Сивцев, Н.Местникова), үһүс бириистээх миэстэҕэ Мүрү 2 №-дээх оскуолатын 2 «а» кылааһын оҕолоро (Уус Алдан, сал. А.Лонгинова) тиксибиттэр.
Иккис бөлөххө биирдиилээн толорууга кыайыылааҕынан Амма лиссиэйин 7 кылааһыгар үөрэнэр Артем Лукин (Амма, сал.М.Ноговицына) тахсыбыт. Иккиһи Айтал Соловьев (Күннүк Уурастыырап аатынан оскуола 11 кыл.үөрэнээччитэ, Амма, Эмис. Сал. У.Захарова), үсүһү Светлана Федорова (Дьокуускай, 7 №-дээх оскуола, 10 «а» кыл. Сал. Н.Шестакова) ылбыттар.
Кэлэктиибинэн ааҕыыга 1 миэстэ Хамаҕатта саха-французскай лиссиэй 9 кыл.оҕолоругар (сал. Ю.Парникова, Нам) туттарыллыбыт. Иккис миэстэҕэ тилэх үктэһэн И.Гаврильев аатынан Нам оскуолатын 7 кылааһын үөрэнээччилэрэ (сал. М.Говорова, Л.Кривошапкина), үһүс бочуоттаахха Н.Дьяконов аатынан Тыайа оскуолатын 9,10,11 кылааһын үөрэнээччилэрэ (сал.В.Федорова. Кэбээйи) тахсыбыттар.
Куонкурус кыайыылаахтарыгар грамоталар уонна сыаналаах бириистэр дохсун ытыс тыаһынан доҕуһуолланан туттарыллыбыттар. Маны сэргэ, дьон-сэргэ болҕомтотун тардыбыт ааҕааччылар дьүүллүүр сүбэ анал бириистэринэн наҕараадаламмыттар.
Биһиги корр., “Саха сирэ” хаһыат,edersaas.ru