close
Мусуойга композитор Марк Жирковка анаммыт быыстапка арылынна...
Култуура - Олох-дьаһах

Мусуойга композитор Марк Жирковка анаммыт быыстапка арылынна

Бу күннэргэ Саха чулуу композитора Марк Николаевич Жирков төрөөбүтэ 125 сылыгар анаммыт араас тэрээһиннэр ыытыллаллар. Оруобуна биллиилээх композитор төрөөбүт күнүгэр, олунньу 20 күнүгэр Емельян Ярославскай аатынан мусуойга кини олоҕор анаммыт быыстапка арылынна.

Чокуур Гаврильев, «Саха сирэ» хаһыат, www.edersaas.ru

Быыстапка арыллыытыгар Бүлүү улууһун баһылыга Сергей Винокуров биир дойдулаахтара Марк Жирков аатын үйэтитэр туһугар ханнык үлэни ыыталларын, үбүлүөйдээх тэрээһин туһунан сырдатта.

«П. И. Чайковскай аатынан Москватааҕы судаарыстыбаннай консерваторияны бүтэрбит 400 чулуу киһи ортотугар сахалартан Марк Жирков уонна Анегина Ильина бааллар. Кинини үөрэммит кыһатыгар үрдүктүк туталлар. Хомойуох иһин, биһиги улууканнаах композиторбытын үчүгэйдик билэ, ситэ үөрэтэ иликпит дии саныыбын. Кини аатын үйэтинэн, үүнэр көлүөнэлэргэ тиэрдиэхтээхпит» — диэтэ Сергей Николаевич.

Композитор олоҕун-дьаһаҕын туһунан уонна кини айар үлэтигэр анаан икки дьоһун кинигэни улуус дьаһалтата бэчээттэппит. Онтон муус устар 23 күнүгэр Марк Жирков саҥа булуллубут партитуратын балеты көрөөччүлэр Опера уонна балет тыйаатырыгар сэргиэхтэрэ.

Быыстапка П.Х.Староватов аатынан кыраайы үөрэтэр мусуой экспонаттарыттан турар. Композитор  торуоската, тутта сылдьыбыт араас тээбиринэ, ноталара барыта кэрэ кэпсээн кэһиитэ буолан мусуойга тураллар.

Өксөкүлээх Өлөксөй аатынан норуот доҕордоһууларын киинигэр киэһэ 18.00 чаастан бэртээхэй кэнсиэр буолла. Кэнсиэртэн киирбит үбү Бүлүү улууһугар ыытыллар Олоҥхо ыһыаҕар туһаныахтара. Мустубут дьоҥҥо Марк Жирков туһунан иһитиннэриини космонавтар билиһиннэрдилэр. Кини мэтириэтин халлаан куйаарыгар таһаарбыттар. Биир дойдулаахтара Бүлүү улууһун мелодистарын, ансаамбылларын, эстрада ырыаһыттарын кэнсиэрин астына-дуоһуйа көрөн, үөрэн-көтөн тарҕастылар.

 

http://www.edersaas.ru/dokuuskajga-b-l-kultuuratyn-k-nnerin-byragyraamata/

0
0

Сайт матырыйаалларын ааптар көҥүлэ суох ылар бобуллар.
Facebook
Facebook
Instagram
GOOGLE
http://edersaas.ru/musuojga-kompozitor-mark-zhirkovka-anammyt-byystapka-arylynna/

Санааҕын хааллар

INSTAGRAM ЛЕНТАТА

Instagram батыһан бар