Мындаҕаайыга ТХПК, агрооскуола уонна бааһынай кэпэрээссийэлэһэн үлэлииллэр

Бөлөххө киир:

Тыа хаһаайыстыбатын миниистирин э.т. Александр Атласов Чурапчы улууһугар оробуочай сырыытын кэмигэр Мындаҕаайыга эдэр фермер Данил Павловы көрүстэ. Данил Данилович бааһынай хаһаайыстыбаны 2015 сыллаахха тэриниэҕиттэн оҕуруот аһын үүннэриинэн дьарыктанар.

edersaas.ru

Эдэр фермер Данил Павлов.

Данил Павлов агрооскуолаҕа дириэктэрдии сылдьан: “Бэйэбит сирбитигэр хортуоппуй, хаппыыста дэлэйдик олордон, үүннэрэн, атыыга таһааран, тоҕо атын улуустары кытта хааччыйыа суохтаахпытый”, — диэн санааттан хаһаайыстыба тэринэн, 2016 сыллаахха граҥҥа киирсибит. Бастакы сылларыгар Өлүөхүмэттэн хортуоппуй сиэмэтин атыылаһан аҕалан, 7 гектар иэннээх сиргэ ыспыттар. Ону таһынан хаппыыста уонна сүбүөкүлэ олордубуттар. Биллэн турар, хаппыыстаны көрөр-истэр олус сыралаах, ол эрээри, үгүс ыал бэйэтэ олордубатынан, атыыга хамаҕатык барыа диэн эрэх-турах санаалаах. Былырыын 1 гектартан 11 туонна хаппыыста үүнүүтүн ылбыт. Итиэннэ 20 гектарга хортуоппуй ыһыылааҕын быйыл 25 гектарга диэри кэҥэппит, оттон моркуоптаах сүбүөкүлэтин 60 суотайга тиийэ улаатыннарбыт.

Ыалдьыттарга ситэ илик тутуутун көрдөрөр.

Куһаҕана диэн, хаһаайыстыба ылбыт үүнүүтүн уурар-харайар анал сирэ суох эбит. Ааспыт кыһын гаражка ууран хаһааммыттар. Данил 500 туонна хортуоппуй, оҕуруот аһа киирэр истээх хранилище көҥдөйүн туттубутун көрдөрдө. “Матырыйааллааҕым буоллар, тутуубун ситэриэм этэ”, — диир. Бу тутууга барыта 27 мөл. солк. кээмэйдээх үп эрэйиллэр эбит. Быйыл бырагыраамаҕа киирсиэхтээҕин, бүддьүөт үбүн оптимизациялааһыҥҥа түбэһэн, кыайан киирбэтэх. Эдэр фермер Тыа хаһаайыстыбатын министиэристибэтэ күүс-көмө буолан, кэлэр сыллааҕы бырагыраамаҕа киллэрэллэригэр баҕа санаатын этиннэ.

Мындаҕаайы оҕуруотчут оҕолоро.

Миниистир салайааччылаах бөлөх салгыы Бэс Күбээйи учаастагар тиийдэ. Сыралҕан куйааһы  билиммэккэ, оскуола оҕолоро сыыс от үргүү, хортуоппуй көмө сылдьаллар. Олохтоох агрооскуола бэйэтэ сирдээх. Үөрэнээччилэр саас  4 гектарга хаппыыста ыспыттар, 3 гектарга бурдук ыһыылаахтар, ону таһынан оттуур ходуһалаахтар эбит. «Мындаҕаайы» ТХПК, агрооскуола уонна Д.Д.Павлов бааһынай хаһаайыстыбата Чурапчы улууhугар тыа хаhаайыстыбата сайдарын туhугар сүбэлэрин холбоон, кэпэрээссийэлэһэн,  үгүс үлэни ыыталлар.

Тыа хаһаайыстыбатын миниистирин э.т. Александр Атласов агрооскуола дириэктэрэ Виктория Пермякованы уонна «Мындаҕаайы» ТХПК бэрэссэдээтэлэ Дмитрий Ноевы кытта.

Данил Павлов дуогабардаһан, агрооскуоланы уонна оҕо саадын хааччыйар эбит. “Мындаҕаайы” ТХПК элбэх тиэхиньикэлээх. Ааспыт сылга икки бырагыраамаҕа киирсэн, культиватор уонна быйыл улахан комбайн ылбыт. Оттон Үлэ дьоруойа Р.И.Константинов аатынан агрооскуола дириэктэрэ Виктория Ивановна Пермякова сөптөөхтүк дьаһанан, быйыл оскуола «Туймаада-Лизинг» хампаанньаттан лизиҥҥэ «Беларус-82.1» тыраахтары атыыласпыта улахан төһүү буолбут. Маннык тэрээһиннээх үлэ күһүҥҥү хомуур түмүгэр үтүө сабыдыаллаах буолуо диэн нэһилиэк  тыа хаһаайыстыбатын тэриллиилэрин салайааччылара эрэнэллэр.

Анна СЕРГУЧЕВА (ТХМ пресс-сулууспата) суруйуута уонна хаартыскаҕа түһэриитэ.

+1
0
+1
0
+1
0
+1
0
+1
0
+1
0
+1
0