“Нөмүгү” агрофирма күҥҥэ икки туонна үүтү ыыр (ВИДЕО)

Ааптар: 
Бөлөххө киир:

Хаһаайыстыба 500-чэкэ сүөһүлээх, ол иһигэр 159 ыанар ынахтаах. edersaas ru

Сүөһү аһылыгын базатын агрофирма сыллата толору хааччыйар. Онуоха айылҕа ходуһаҕа төһөнү биэрэрин эрэ кэтээбэт, үгүс үүнүүнү бааһынаттан хомуйар. Холобур, былырыын бурдугу 355 гектарга, ол иһигэр 140 гектарга эбиэс “Покровскай” суордун, 215 гектарга “Тамми” ньэчимиэни, ону таһынан күөх кэнбиэйэргэ анаан 126 гектарга эбиэс ыспыта. Онон, уһун кыстык устата хас биирдии ынахха күҥҥэ 25 киилэ сиилэһи, аҕыс киилэ комбикорманы уонна 15-20 киилэ оту сиэппитэ. Быйыл да бурдугу 320 гектарга, ону таһынан сиилэскэ анаан эбиэһи 368 гектарга ыспыт.

Агрофирма 141 ньирэйин Куталаах сайылыгар Мария Романова уонна Артем Уваровскай көрөллөр. Кинилэр кыһамньыларынан бу хотокулар ыйааһыннара сууккаҕа 700 грамм эбиллэр. Оттон ыанар ынах Хараанайга сайылыыр.

— Билигин күннэтэ икки туонна киилэ бастакы суортаах үүтү “Хаҥалас-Ас” кэпэрэтиипкэ туттара олоробут, — диир зоотехник Михаил Борисов. — Ааспыт сыл устата хас биирдии ынахпытыттан ортотунан 3 тыһ. 462 киилэ үүтү ыабыппыт.

Даҕатан эттэххэ, агрофима ынаҕы искусственнайдык буоһатыыны дэгиттэр баһылаан, төрүөҕү дьыл кэмиттэн тутулуга суох ылар, үүтү төгүрүк сыл устата курулаччы ыыр. Онуоха быстыбат күөх аһылык улахан оруоллаах итиэннэ сопхуос саҕаттан үлэлиир уопуттаах осеменатор Евдокия Устинова өҥөлөөх. Евдокия Дмитриевна быйыл ынахтарын гольштин хааннаах оҕустар сиэмэлэринэн сиэмэлээбит.

Пиэрмэ титиигэр түөрт ыаннньыксыт иккилии буолан күнүнэн солбуһан үлэлииллэр. Бүгүн массыынанан ыаһын оператордарын өрөспүүбүлүкэтээҕи күрэхтэһиилэрин хас да төгүллээх призера, кыайыылааҕа Александр Горомов уонна Мария Тарабукина симиэнэлэрэ. Кинилэр далтан ыыр саалаҕа сүүрбэччэ ынаҕы киллэрэн, икки кэккэнэн туруортаатылар. Итиэннэ синньилэрин сылаас уунан сууйан, ыраас тирээпкэнэн куурда соттулар. Хас биирдии ынах аттынан баар компьютер кнопкатын баттаат, ынах эмиийигэр ыыр аппараат ыстакааннарын кэтэртилэр. Чыпчылыйыах бэтэрээ өттүгэр ыстакааннар илигирэһэ түһээттэрин кытары турба устун үрүҥ сүүрүктэр элэҥнэһэ сүүрдүлэр.

Раиса Сибирякова, “Саха сирэ” хаһыат, edersaas ru.

+1
0
+1
0
+1
0
+1
0
+1
0
+1
0
+1
0