Оптуобуска айанныыргар харчы төлөөбүтүҥ кэннэ, кондуктордар куруук билиэт биэрэн үҥүлүтэллэр. Ону ардыгар суолта биэрэн ылбат буола сатыыгын. «Онто да суох хармааммар харчы буолбакка, кумааҕы бөх буолан мунньуллара элбэх» дии саныыгын.
Биһиги корр., «Саха сирэ» хаһыат, edersaas.ru
Дьэ, онтубут баара ити билиэппит ыксаллаах кэмҥэ туһата элбэх эбит. Үнүр кийиитим куорат таһынааҕы сэлиэнньэҕэ өр көрсүбэтэх дьүөгэтигэр күүлэйдии тахсыбыт.
Өр айанныыр буолан, суол былаһын тухары төлөпүөнүнэн кэпсэтэ, сэлэһэ испит. Биирдэ өйдөөбүтэ, кини тохтобулун биллэрэн эрэллэр эбит. Соһуйан, ойон тураат аан диэки ыстаммыт. Хааман иһэн тоҥо быһыытыйан, бэрчээккитин кэтээри гыммыта мэлигир. Кийиитим барахсан наһаа хомойбут. Мин, хаһан эрэ, үтүө кэмнэрбэр Туурсуйаҕа бара сылдьан атыылаһан аҕалбыт күндү бэлэҕим этэ. Онон мин да хомойо быһыытыйдым. Биһиги, эр дьон үтүлүкпүтүн хармааммытыгар симтэр буоллахпытына, дьахталлар барахсаттар сиэпкэ уктубакка суумкаларын кытта тэҥҥэ тутан олороллор эбит. Ол да иһин, кийиитим бэрчээккилээҕин умнан ойон тураатын кытта, үтүлүгэ түспүтүн билбэккэ да хаалаахтаабыт. Ким да көрөн этэн биэрээхтээбэтэх.
Сүтүктээх сүүс аньыылаах дииллэринии, төннөрүгэр суолтатыгар да буоллар, атын оптуобус кондукторыгар кэпсээбит. Онуоха кондуктор: «Айаннаабыт билиэтиҥ баар дуо? Онно хассыыр аата сурулла сылдьар, киниттэн ирдэс», – диэбит.
Кырдьыга да, биһиги билиэккэ кондуктор аата, хас чааска айаннаабытыҥ, хас чааска билиэти быһан биэрбиттэрэ сурулла сылдьарын билбэт эбиппит. Дьэ, кийиитим автовокзалга тиийэн, ол кондукторы аатынан ирдэһэн булан ылбыт. Онон, хата сүтүгүн эмиэ булан, үөрэн-көтөн кэлбитэ.
Билиэккэ кондуктор аата суоҕа буоллар, ханнык оптуобуска олорбуккун эйиэхэ этэн да бэртэр. Онуоха сырыы-айан да элбэҕэ бэрт буоллаҕа. Онон, айанньыттарга оптуобус билиэтин мээнэ быраҕымаҥ, онуоха-маныаха диэри илдьэ сылдьыҥ диэн сүбэлиэхпин баҕарабын. Наадалаах кумааҕы эбит.
Биһиги корр.,«Саха сирэ» хаһыат, edersaas.ru