Киин куорат таһыгар баар Хатас сэлиэнньэтин олохтоохторо Теннэр араас дьиэ көтөрүн: кууруссалары, өндүүктэри, кустары уонна хаастары иитэллэр.
Edersaas ru.
Ыал ийэтэ Надежда Алексеевна бу хаһаайыстыбатын үс сыллааҕыта, үһүс оҕотунан декреттээх уоппускатыгар олорон тэриммит. Оҕолоругар сибиэһэй сымыыты уонна диетическэй көтөр этин сиэтээри, «Дьокуускайдааҕы көтөр фабриката» ААУо-ттан бастаан куурусса ылбыт. Эһиилигэр олохтоохтук дьарыктанарга сананан, интэриниэтинэн инкубатор атыыласпыт. Биллэн турар, кини маны соҕотоҕун кыайбат, кэргэнэ кууруссаҕа анаан кыһыҥҥы уйаны тутан, үлэлиир-хамсыыр усулуобуйатын тэрийэн биэрбит. Инньэ гынан, төгүрүк сыл устата сымыыт да быстыбат, чоппууска да тахса турар буолбут.
Билигин Теннэргэ куурусса эккэ, сымыыкка уонна бройлерга идэтийэр боруодалара баар. Хайа ыал оҕуруота суох сатаныай? Онон, хортуоппуйу уонна оҕурсуну, помидору, биэрэһи, хаппыыстаны, моркуобу, эрэдиискэни уонна тума буолар күөх үүнээйини хото үүннэрэллэр. Помидордарын, оҕурсуларын сиэбиттэрэ ырааппыт.
Үлэһит ыаллар көтөрдөрүн ахсаанын элбэтэр итиэннэ аны коза ииттэр баҕалаахтар. Дьиэ кэргэн уонна бааһынай хаһаайыстыбаларын өйүүр бырагыраамалары сүрдээҕин интэриэһиргииллэр, кэлэр өттүгэр онно киирсэргэ сананаллар. Инньэ гынан, иннилэригэр өссө үгүс үлэ, түбүк турар эбит.
Надежда Тен, ыал ийэтэ:
— Идэтийэн үлэлиир ыал сибиэһэй аһынан-үөлүнэн хааччыммытын таһынан, бэйэтин сыралаах үлэтинэн олорор сэлиэнньэтин, тыа хаһаайыстыбатын салаатын сайыннарыыга сэмэй кылааты киллэрэр эбит диэн санааҕа кэллим. Ити иһин куорат таһыгар олорор ыалларга ким кыахтааҕынан дьиэ көтөрүн эбэтэр ынах-сылгы сүөһүнү ииттэллэригэр сүбэлиибин. Дьокуускай куорат дьаһалтата бас билии көрүҥүттэн тутулуга суох, үлэлиир-хамсыыр баҕалаахтары өйүүрүн түмүгэр, тыа хаһаайыстыбатын көрдөрүүлэрэ бытааннык да буоллар, сыллата үүнэ тураллар. Кэлиҥҥи биэс сыл устата сиртэн үүнээйини ылыы 2001 сылы кытары тэҥнээтэххэ, 25 %-ынан улаатта, сүөһү-сылгы, сибиинньэ уонна көтөр ахсаана эрэллээхтик эбиллэр, хаһаайыстыбалар базаны саҥардыыга утумнаахтык үлэлииллэр.
Раиса СИБИРЯКОВА, «Саха сирэ» хаһыат, Edersaas ru.
