Былыр да, быйыл да Уус Алдан улууһун Найахы нэһилиэгин олохтоохторо быыбарга сүрдээх көхтөөхтүк кыттааччылар. Бүгүн да, бу улахан суолталаах быыбарга нэһилиэнньэ 80, 48 %-на кытынна.
edersaas.ru
Найахылар көннөрү куоластаан баран, саҥата-иҥэтэ суох дьиэлэригэр тарҕаһааччылара суох, сэргэх тэрээһиннэри хайаан да ыыталлар.
Ол курдук, бүгүҥҥү күн устатыгар «Вместе выше, сильнее, быстрее!» диэн спортивнай күрэхтэһиигэ 51 киһи кытынна: үөрэнээччилэр, кинилэр төрөппүттэрэ, оскуоланы бүтэрбит ыччаттар.
Олохтоохтор мас тардыһыытыгар, мээчиги корзинаҕа быраҕыыга, эстафетаҕа уонна канаат тардыһыытыгар күрэс былдьастылар.
Күн бүтүүтүгэр, ыалларга аналлаах «Россия — родина моя!» диэн квест-викторина ыыпыттар. Уратыта диэн — батсаабынан.
Кыттааччылар «Мин сэлиэнньэм», «Мин улууһум», «Мин өрөспүүбүлүкэм», «Мин Арассыыйам» диэн түөрт түһүмэххэ хоруйдаатылар. Хас биирдии түһүмэххэ биэстии ыйытыы баар. Бу ыйытыылар муусукаҕа, историяҕа, биллиилээх дьоҥҥо сыһыаннаахтар.
Бу квест-викторинаҕа 10 ыал кыттыбытыттан, кыайыылаахтарынан Анастасия, Афанасий Пантиловтар ааттаннылар. Иккис миэстэҕэ Сахаяна, Иван Фоминнар тигистилэр. Уонна үһүс бочуоттаах миэстэни Раиса, Степан Атласовтар ыллылар.
Онтон оскуолаҕа «Мин оскуолам» өрөспүүбүлүкэтээҕи бырайыак чэрчитинэн араас тэрээһиннэр ыытыллыннылар.
Манна биир бэлиэ түгэнинэн 11-с кылаас үөрэнээччитэ Анита Саввина «Мир вокруг меня» диэн персональнай фотовыставката буолла.
Дьэ, бу курдук ырыаһыт найахылар быыбардыыр да күннэрэ бырааһынньык курдук үөрүүлээхтик, сэргэхтик ааста.
Вера Макарова, «Саха сирэ» хаһыат, edersaas.ru