Накыын вахтовай бөһүөлэгин уоттан көмүскүүргэ 12 баһаарынайдар көттүлэр
Ньурба улууһун Накыын вахтовай бөһүөлэгэр тыал күүһүрэн, ойуур баһаара минерализованнай балаһа нөҥүө «ыстанан», кутталы үөскэтэ сырытта. Бу туһунан СӨ Ойуур сыһыаннаһыыларыгар департамент салайааччытын солбуйааччыта Дьулустаан Хон иһитиннэрдэ.
edersaas.ru
Бүгүн 11.30 ч. Ньурбаттан 12 киһилээх баһаарынай парашютистар бөлөхтөрө уоту умуруора бардылар. Баһаар тарҕаммыт сирин чуолкайдыырга «АЛРОСА» АХ бөртөлүөтүнэн чугастааҕы сири үөһэттэн көтө сылдьан көрдүлэр.
Дьулустаан Хон этэринэн, Ньурбатааҕы ГОК ыскалаатыгар уонна нефтебазаҕа дэлби тэбии тахсыбатын туһугар баһаары утары охсуһар тэрээһин ыытыллыбыт.
«Катарпиллер Д6 А» тыраахтарынан уот тарҕанарын тохтотор хотугулуу-арҕаа минерализованнай харгыс оҥоһуллубут. Ботуобуйа карьер илиҥҥи өттүттэн 5 км. уһуннаах «Дьахтар үрэҕэ» өрүс үһүс күөлүгэр диэри минерализованнай балаһа тардыбыттар. Ойуур баһаарын соҕурууҥҥу-арҕаа өттүгэр күөл диэкиттэн хотугулуу-арҕаа 8 км. харгыс бириистэҥҥэ диэри уонна 12,5 км. балаһа «Лиендокит Гидроузелыгар» ууруллубут.
Нэһилиэнньэлээх пууну уонна экэниэмикэ эбийиэктэриттэн уоттан харыстыырга эбии харгыс оҥоһуллар.
«Ыксал тирээтэҕинэ, вахтовай бөһүөлэги көмүскүүргэ чугастааҕы улуустартан эбии көмө кэлиэҕэ. Билиҥҥитэ нэһилиэнньэҕэ уонна экэниэмикэ эбийиэктэригэр куттал суоһаабат», — диэтэ Дьулустаан Хон.
Марианна Тыртыкова, «Саха сирэ», edersaas.ru