Хонон турдах ахсын сүөһү-сылгы кыстыга ыараан иһэр. Илин эҥээрдээҕи уонна киин улуустарга элбэх сылгы эбии аһылыкка эрдэ киирэн, хаһаас от тиийбэт туруктанна. Нам уонна Уус Алдан улуустара ордук оҕустарар чинчилээхтэр.
Нам улууһунааҕы тыа хаһаайыстыбатын департаменын салайааччыта Прокопий Окоемов нэһилиэктэртэн киирбит сайаапкаларга олоҕуран этэринэн, улуус үрдүнэн 660 туонна от тиийбэт. Ыаллыы улуустарыттан от булбакка, Сунтаартан 200 туоннаны атыылаһарга кэпсэппиттэр. Ону таһынан Магадан уобалаһа 1 тыһ. туонна кэриҥэ атыылыыр оттоох үһү. Онон бу күннэргэ Уус Алдан бэрэстэбиитэллэрин кытта Магадаҥҥа бараары бэлэмнэнэллэр. Уус алданнар сайын былааннаах отторуттан 70 бырыһыанын ылбыттара. Улуус тыатын хаһаайыстыбатын салайар Николай Сивцев кыстыгы туоруурга 300 туонна тиийбэт диир.
Атыыга от сыаната 1 туоннатыгар 5 тыһ. солкуобайтан ыаратыллыа суохтаах. Атын уобаластан тиэйэн аҕалыы ороскуота обургу буолара чуолкай. Оттон бүддьүөт үбэ-харчыта кырыымчык. Олунньу саҥатыгар буолбут видеоконференцияҕа бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев сылгы базатын тутууга көрүллүбүт үптэн кырыйарга күһэллиэхпит диэн эппитэ. Нэһилиэктэр, хаһаайыстыбалар салайааччылара, ордор оттоох буоллаххытына, Нам уонна Уус Алдан улуустарыгар биллэриҥ.
Василий НИКИФОРОВ, «Саха сирэ» хаһыат, edersaas.ru