Наркология өрөспүүбүлүкэтээҕи диспансера Доруобуйа күнүгэр аналлаах дьаарбаҥкаҕа сыл аайы көхтөөхтүк кыттар.
edersaas.ru
Реабилитационнай киин клиническэй психолога Анна Ксенофонтова бу күн баҕалаах дьоҥҥо Люшер теһин ыытта. Өҥнөөх психодиагностикаҕа аналлаах бу тест киһи тус бэйэтин туругун, чуолаан коммуникативнай дьоҕурун, стреһи төһө тулуйарын уонна актыыбынаһын бэрэбиэркэлиир. Барыта 20 киһи маннык диагностиканы барда. Анна Семеновна тест түмүктэринэн тустаах сүбэлэри-амалары биэрдэ. Элбэх киһи (чуолаан арыгыттан тутулуктаах дьон аймахтара) кэлэн ыйыталаста, сүбэ-ама ылла.
«Биһиги бары билэрбит курдук, арыгыттан тутулуктаныы арыгыны иһэр эрэ киһи буолбакка, кини чугас дьонун кыһалҕаларынан буолар. Арыгы содулуттан дьиэ кэргэн барыта эрэйдэнэр. Итинник кыһалҕаны көрсүбүт буоллаххытына, төһө кыалларынан түргэнник босхолоно сатааҥ. Арыгыны куруук иһэ сылдьыы – ыарыы. Ону идэлээх исписэлиис эрэ эмтиир кыахтаах», – диэн нарколог-психиатр Светлана Шемякина сүбэлээтэ.
Доруобуйа дьаарбаҥкатыгар сылдьыбакка хаалбыт дьон наркология өрөспүүбүлүкэтээҕи диспансерыгар (Автодорожнай уул. 38 нүөмэрдээх дьиэ дьиэтин иккис этээһигэр) кэлэн нарколог-психиатрдары кытары билсиэххитин-көрсүөххүтүн сөп.
Надежда ЕГОРОВА, «Саха сирэ» хаһыат, edersaas.ru