Арыгы атыытын сүрүннүүр судаарыстыбаннай управление салайааччыта Матвей Лыткин тус рубриката.
Билигин арыгы эрэ норуоту имири эһэр кыахтаах буолбатах. Пиибэ арыгытааҕар ордук кутталлаах, кэскили кэҕиннэрэр кыахтаах утах буолар. Реклама көмөтүнэн пиибэ атыыта сылтан сыл аайы элбээн иһэр, оннук курдук пиибэни иһээччилэр эмиэ элбииллэр. Саамай кутталлааҕа, пиибэни иһээччилэр саастара эдэримсийэн иһэр.
Эдэр дьон пиибэ туһунан кырдьыгы билбэттэриттэн, бэйэлэрин саастыылаахтарын үтүктэн, пиибэни иһэллэр уонна амсайан баран эйфорияҕа киирэннэр, кэлин сатаан аккаастаммат буолаллар. Көннөрү ас, утах дии саныыллар. Онуоха амтана аһыы буолбатах, иһэргэ бэрт түргэнник үөрэнэллэр. Оскуола саастаах оҕолор бары пиибэни амсайан баран, арыгы иһэр буолаллар. Дьахталлар эмиэ түргэнник ыллараллар, устунан кыраадыстаах арыгыга олус түргэнник үөрэнэллэр. Пиибэ өссө биир уодаһына — киһи гормональнай систиэмэтигэр дьайар, ол иһин куруук иһэр эр дьон улахан истээх, самыылаах, эмиийдээх буолаллар.
Дьиҥинэн, пиибэ саамай чэпчэкитик атыылаһыллар наркотик буолар. Мэйиигэ наркотик курдук дьайар, ол иһин аккаастанарга ыарахан. Аны пиибэттэн саҕалаан атын күүстээх наркотиктарга аан аһыллар. Холобур, Аан дойдутааҕы чөл олох академията биллэрэринэн: 99 % наркоманнар бары бастаан пиибэ иһэллэр уонна табах тардаллар эбит.
Өссө пиибэни араас минньигэс утах курдук амтаннаан оҥорор буолбуттар. Ону эдэр дьон утах дии санаан, “Маны истэхпинэ, туох буолуохпунуй?» дии саныыллар. Ити арыгыны атыылааччылар оҕуруктаах толкуйдара буолар, наркотигы минньигэс утах курдук оҥорон, сүрүннээн эдэр дьон уонна кэрэ аҥардар өйдөрүн-санааларын булкуйаллар.
Онон, Саха сирин олохтоохторо, пиибэ наркотик буоларын өйдөөҥ уонна инники кэскилгитин харыстааҥ, оҕолоргутун кытары быһааран кэпсэтэр буолуҥ.