Народнай поэт, Саха сирин Суруйааччыларын сойууһун бэрэссэдээтэлэ, Россия Суруйааччыларын сойууһун чилиэнэ, суруналыыс Наталья Ивановна Харлампьева бүгүн 65 сааһын туолла. Үбүлүөйдээх тэрээһин Бырабыыталыстыба 2-с нүөмэрдээх дьиэтигэр буолла.
Н.И.Харлампьева 1952 с. балаҕан ыйын 1 күнүгэр Маҕаҥҥа күн сирин көрбүтэ. СГУ история-филология факультетыгар үөрэммитэ.
Наталья Ивановна 1975 с. бэчээттэнэр. Бастакы хоһооннорун хомуурунньуга «Аэроплан» диэн ааттанан 1976 с. тахсыбыта. 1988 с. ССРС Суруйааччыларын сойууһугар киирбитэ.
Н.Харлампьева Маҕан аэропордугар таһаҕаһы таһыы сулууспатыгар, «Северная трасса» хаһыакка, ССКП обкомугар бэчээт секторын инструкторынан, Кэбээйи райкомугар сэкирэтээринэн, «Кыым» хаһыакка култуура салаатын сэбиэдиссэйинэн, Саха сиринээҕи кинигэ кыһатын кылаабынай эрэдээктэринэн, «Саха Сирэ» хаһыат кылаабынай эрэдээктэрин бастакы солбуйааччынан, «Далбар Хотун» сурунаал кылаабынай эрэдээктэринэн, СӨ култууратын уонна духуобунай сайдыытын миниистирин бастакы солбуйааччынан үлэлээбитэ.
2002 с. уон сыл устата «Саха сирэ» хаһыаты салайбыта. 2012 с. Ил Дархан сүбэһитинэн үлэлээн кэллэ.
Бу дьоро күҥҥэ Наталья Ивановна үөрүүтүн үллэстэ биир идэлээхтэрэ суруйааччылар, суруналыыстар, үлэлээбит тэрилтэлэрин кэлэктииптэрэ, министиэристибэлэр, улуустар бэрэстэбиитэллэрэ, аймахтара, айар үлэтигэр сүгүрүйээччилэр, литературоведтар, о.д.а. кэллилэр. Бу долгутуулаах дьоро киэһэ мустубут ыалдьыттар истиҥ тылларын анаатылар. Үбүлүөйдээх биэчэргэ Наталья Ивановнаны элбэхтэ Далбар Хотуҥҥа холоотулар. Кырдьыга, оннук. Ол кини «Далбар Хотун» сурунаалы төрүттээбитинэн, онно эрэдээктэрдээн олорбутунан буолбакка, кини ханна да тиийдэр, ханна да үлэлээтэр Далбар Хотуннуу дьоһунун, аламаҕайын, муударайын көрдөрбүтүн иһин. Ити айар үлэтигэр эрэ сыһыаннаах буолбатах. Үлэтин саҕалаабыт аэропордуттан кэлэн лүөччүктэр профкомнарын бэрэссэдээтэлэ Ананьев аатынан анал бэлиэни туттарбыттара элбэҕи этэр эбээт.
Наталья Ивановна үбүлүөйүн көрсө бэйэтигэр бэлэх оҥостон, «Мин аалым – балаҕаным» диэн саҥа кинигэтин бэлэмнээн таһаартарда.
Наталья Харлампьева РФ уонна СӨ култуураларын үтүөлээх үлэһитэ, Саха комсомолун бириэмийэтин, Казахстан «Алаш» литературнай бириэмийэтин, Россия Улахан литературнай бириэмийэтин лауреаттара, кэнники сыллардааҕы хоһооннорун таһаарыыларын иһин А.Т.Твардовскай аатынан бириэмийэ лауреата, Маҕан бөһүөлэгин, Горнай улууһун Бочуоттаах олохтооҕо, иһирэх ийэ, эйэҕэс эбэ.
Аграфена КУЗЬМИНА, “Саха сирэ” хаһыат, edersaas.ru