Наталья Чукавина: 2017 сыллааҕы “Куораттары тупсарыы” бырайык 100% туолла
2017 сылтан «Куораттары тупсарыы» бырайыак үлэтин саҕалаабыта. Бу олус киэҥ хабааннаах, дьон куораттарга уонна бөһүөлэктэргэ олорор уонна сынньанар усулуобуйатын тупсарар үлэ. Бырайыак ааспыт сылга төһө таһаарыылаахтык үлэлээбитин Саха Өрөспүүбүлүкэтин дьиэ-уот уонна коммунальнай хаһаайыстыба миниистирин солбуйааччы Наталья Чукавина сырдатта.
Наталья Чукавина, Саха Өрөспүүбүлүкэтин дьиэ-уот уонна коммунальнай хаһаайыстыба миниистирин солбуйааччы:
— 2017 сыллааҕы “Куораттары тупсарыы” бырайык 100% толорулунна. Бырайыак чэрчитинэн туруоруллубут соруктар оҥоһулуннулар. 57 олорор дьиэ таһа, 18 дьон маасабайдык сылдьар сирдэрэ тупсарылыннылар. Бырайыакка уопсайа 224 мөл. Солкуобай көрүлүннэ. Ол иһигэр 199,47 мөл. солк. — федеральнай бүддьүөттэн, 24,65 мөл. солк. — өрөспүүбүлүкэ бүддьүөтүттэн. Бырайыагы олоххо киллэрэргэ көрүллүбүт үп 100 % туһанылынна. Хотугу эрэгийиэн буоларбыт быһыытынан мал таһыыыгар кыра ыарахаттары көрсүбүппүт. Арассыыйа үрдүнэн олус кылгас больдох турбута. Ол да буоллар бырайыакка үлэлэһэ сылдьыбыт 9 муниципальнай тэриллии былааны толордо. Ол иһин кинилэргэ махталбын тиэрдэбин. 2017 сылга ыытыллыбыт үлэттэн сиэттэрэн, бу сылга уопутурбучча түргэнник үлэлиэх тустаахпыт. Бырайыактар ааптардарын бырааптарын көмүскүүр үлэни өссө күүһүрдүөхпүт, кытаатыннарыахпыт. Покровскайга паарка сөргүтүллүбүтүн бэлиэтиэхпин баҕарабын. Миирнэйгэ сабыс-саҥа паарка тутулунна. Удачнайга храм таһыгар дьон сынньанар, дьарбайар сирэ баар буолла. Айхалга болуоссат тутулунна. Дьокуускайга аныгы оҕо былаһааккалара тутуллубуттара. Бу тутуулар “Куораттары тупсарар” бырайыак олус таһаарылааҕын уонна туһалааҕын туоһулууллар.
“Куораттары тупсарыы” бырайыак сыл аайы үлэлээн, 2022 сылга диэри олохпутун-дьаһахпытын тупсарар чинчилээх.
Николай Попов, «Саха сирэ» хаһыат, edersaas.ru