Саха сирин суруйааччыларын сойууһа Дьокуускай куорат аэропордугар судаарыстыбаннаспытын, автономиябытын төрүттээбит, өрөспүүбүлүкэбит сайдыытыгар сүҥкэн кылааты киллэрсибит суруйааччы Платон Ойуунускай аатын иҥэрэри өйүүрүн биллэрбитэ. Сойуус бэрэссэдээтэлэ, народнай поэт Наталья Харлампьева бу туһунан санаатын этэр.
— Бүтүн дойду үрдүнэн “Россия улуу ааттара” диэн хамсааһын саҕаланна. Аһаҕас куоластааһын түмүгүнэн дойду 45 аэропорда улуу дьон ааттарын ылыахтаах. Ол иһигэр Дьокуускай куорат аэропорда эмиэ киирсэр.
Куоластааһын бэрт тэтимнээхтик саҕаланна. Хамсааһын иккис түһүмэҕин түмүгүнэн, уонча биллэр-көстөр киһи аата испииһэккэ киирдэ. Кинилэр ортолоругар Платон Алексеевич Ойуунускай баар. Кини суруйааччы, учуонай, өрөспүүбүлүкэ гуманитарнай үөрэҕин сайдыытыгар үгүс суолталаах тэрилтэлэрин олохтоспут киһи буоларын бэркэ билэбит. Платон Алексеевич тыл уонна литература институтун, кинигэ кыһатын олохтообута, Саха сирин суруйааччыларын сойууһун бастакы бэрэссэдээтэлэ. Аны, өрөспүүбүлүкэбит судаарыстыбаннаһын олугун уурсубут бастыҥ киһибит. Ону умнар хайдах да табыллыбат. Ону ааһан Саха сиригэр авиация сүрүн көлө, транспорт буоларын өтө көрөн, бастакы “Сопвич” сөмөлүөт кэлэрин тэрийсибитэ, көтөн кэлбит күнүгэр үөрүүлээх миитиҥҥэ тыл эппитэ.
Быйыл Платон Ойуунускай төрөөбүтэ 125 сыла. Онон сибээстээн аан дойдутааҕы таһымнаах биир баар-суох аэропорпутугар Былатыан Ойуунускай аата иҥэриллэрэ тоҕоостоох дии саныыбын. Хайа уонна атын дойдулар аэропортарын аатын ылан көрүөҕүҥ: Нью Йорка Джон Кеннеди, Парижка Генерал Шарль де Голль, Делига Индира Ганди, Стамбулга Ататюрк, Бакуга Гейдар Алиев ааттарын аэропортар сүгэллэр. Кинилэр бары судаарыстыбаннастарын, дойдуларын, норуоттарын туһугар олохторун анаабыт дьон. Биһиги Ойуунускайбыт өрөспүүбүлүкэ сайдыытыгар дьоһун кылааттаах, саха омугун духуобунаһын тыынын үйэлэргэ уһаппыт, олоҥхобут каноническай тиэкиһин биһиэхэ хаалларбыт улуу киһибит буолар. Онон сахабын дэнэр киһи Ойуунускай туһугар куолаһын биэриэ диэн эрэллээхпин.
Аграфена КУЗЬМИНА, “Саха сирэ” хаһыат, edersaas.ru