close
podpiska

Наталья Строева “Мисс мира” куонкуруска Августина Филиппова айбыт национальнай көстүүмүн к...
· - Култуура - Олох-дьаһах

Наталья Строева “Мисс мира” куонкуруска Августина Филиппова айбыт национальнай көстүүмүн көрдөрдө

Кытайга “Мисс мира” куонкурус” хайы-үйэ саҕаланна. Иккис күн араас дойдулар кэрэ куолара бэйэлэрин национальнай көстүүмнэрин көрдөрдүлэр. Саха сириттэн кыттар Наталья Строева бү түһүмэххэ модельер Августина Филиппова тикпит ураты көстүүлээх көстүүмүн  кэтэн таҕыста.  


Санатан эттэххэ, Наталья Строева “Мисс РС(Я)” титулун ылбыта, ол кэнниттэн Саха сирин чиэһин Бүтүн Арассыыйа таһымыгар көмүскээн, “2 вице-мисс Россия” ааты ылбыта. Бу Наташаҕа “Мисс мира” норуоттар икки ардыларынааҕы куонкуруска  кыттар кыаҕы биэрбитэ. Куонкурус сэтинньи 9 күнүгэр Саньяҕа (Кытай) саҕаламмыта уонна ахсынньы 8 күнүгэр түмүктэниэҕэ.

Былаачыйа  куонкуруска анаан тигиллибитэ. “Мин көстүүммүн астына-дуоһуйа көрдөрдүм, кыттааччылартан, тэрийээччилэртэн уонна олохтоохтортон астынар, биһириир тыллары иһиттим. +25 кыраадыска сону кэтэр итии бөҕө этэ”, — диэн былаачыйатын туһунан Наталья Строева эттэ.

Сэтинньи 7 күнүгэр тиһиктэргэ Саха сириттэн сылдьар кыыс куонкуруска аналлаах аһымал ролига тахсыбыта. Онно өрөспүүбүлүкэбит кэрэ көстүүтэ эрэ буолбакка, социальнай кыһалҕалара эмиэ таарыллыбыттара – Наталья тулаайах оҕолору уонна төрөппүт көрүүтэ-истиитэ суох хаалбыт оҕолор тэрилтэлэригэр иитиллээччилэри уонна бу кыһаны бүтэрээччилэри өйүүр Настаабынньыктааһын киинигэр сылдьан, бу кыһалҕаны СӨ бырабыыталыстыбатын бэрэссэдээтэлин солбуйааччы Ольга Балабкинаны кытта дьүүллэспитэ.

Кытай Санья куоратыгар ахсынньы 8 күнүгэр ыытыллар куонкурус түмүктүүр түһүмэҕэр Саха сириттэн аан бастаан “Мисс мира” куонкуруска кыттар кыыспытыгар бука бары “ыалдьыахпыт”.

edersaas.ru

#бүгүн: 1
3
1

Сайт матырыйаалларын ааптар көҥүлэ суох ылар бобуллар.