Нэһилиэнньэ дохуотун үрдэтэр миэрэлэр

Бөлөххө киир:

Ааспыт нэдиэлэҕэ СӨ Үлэҕэ, социальнай сайдыыга министиэристибэтэ сылы түмүктүүр коллегията буолан ааста. Мунньахха миниистир Елена Волкова нэһилиэнньэ дохуотун үрдэтэргэ уонна дьадайыыны намтатарга туһуламмыт үлэ сыалларын, стратегическай соруктарын туһунан дакылаат аахта.

2017 сылга өрөспүүбүлүкэҕэ дьадайыы таһымыгар олорор нэһилиэнньэ ахсаана – 20%. Онон Арассыыйа үрдүнэн 11-с миэстэни, Уһук Илиҥҥэ – 2-с миэстэни ылар.

Ол эрэн, 2018 сылтан хамнас үрдээһинэ бэлиэтэнэр, былырыыҥҥы сылы кытта тэҥнээтэххэ — 106,4%. Кырдьык, бу сылга кириисиһи билиммэккэ туран, бүддьүөт эйгэтигэр 12 “тус категориялаах” үлэһиттэргэ хамнас үрдээбитэ. Онон, 2012 сылы кытта тэҥнээтэххэ, 2-5 төгүл үрдээбитэ. Холобур, 2017 сыл төрдүс кыбаарталыттан Үлэһиттэр хамнастарын пуондата 25,7 миллиард солкуобайынан үрдээбитэ бэлиэтэнэр. Бырабыыталыстыба 2017 сылтан нэһилиэнньэ дохуотун үрдэтэргэ кэккэ миэрэлэри ылынар. Салгыы бу хайысханан үлэ утумнаахтык ыытыллыа.

Үлэлээбэт биэнсийэлээхтэр дохуоттарын үрдэтэргэ, тиийинэн олоруу алын кээмэйиттэн кыра буоллаҕына, өрөспүүбүлүкэ бүддьүөтүттэн биэнсийэтигэр эбии төлөбүр бэриллэр.

2018 сылга биэнсийэлээххэ тиийинэн олоруу алын кээмэйэ – 13 951 солк. (бастакы арктическай зонаҕа — 17 011 солк., иккис зонаҕа — 13 576 солк.) тэҥнэспитэ. 2018 сыл алтынньы 1 күнүнээҕи туругунан, маннык эбии төлөбүрү ылар дьон ахсаана – 36,6 тыһыынча киһи. Биэнсийэлэригэр ортотунан 4999 солк. эбиллэр.

Ону тэҥэ оҕолоох дьиэ кэргэттэри өйүүргэ, 2012 сылы кытта тэҥнээтэххэ, икки төгүл элбэх үп көрүллүбүтэ.

Ол курдук, демографическай балаһыанньаны тупсарарга, эдэр ыаллары өйүүргэ өрөспүүбүлүкэҕэ сокуонунан бигэргэммит араас миэрэлэр бааллар:

  • Эдэр ыал бастакы оҕото төрөөтөҕүнэ (иитэ ыллахтарына) уонна элбэх оҕолоох дьиэ кэргэттэргэ оҕо таҥаһын ыларга харчынан төлөбүр бэриллэр;

  • Үһүс оҕо төрөөтөҕүнэ (иитэ ыллахтарына) өрөспүүбүлүкэтээҕи Ийэ хапытаала бэриллэр;

  • 10-тан элбэх оҕону төрөппүт (иитэ ылбыт) дьиэ кэргэттэргэ массыына ылалларыгар аналлаах төлөбүр. 2018 сылга төлөбүр суумата 695,7 тыһ. солк. тэҥнэспитэ. Маны таһынан, элбэх оҕолоох дьиэ кэргэттэри өйүүр кэккэ миэрэлэр бааллар.

Онон, 2018 сылга социальнай өйөбүлгэ барыта 16,3 миллиард солк. көрүллүбүтэ. Дууһанан аахтахха, хас биирдии киһиэхэ 16,9 тыһ. солк. тиксэр.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0