Хаҥалас улууһугар “Нөмүгү агрофирмата” ХЭУо үлэһиттэрэ сэтинньи 6 күнүгэр забастовкалыы сылдьыбыттара. Быһыы-майгы арыый көнөн, билигин сүөһү көрүллэр, саах күрдьүллэр. Ол эрээри, гаас оттукка үлэлиир 5 хочуолтан иккитэ тохтоон, аны комплекс тоҥоору ыгылытар.
Санатан эттэххэ, быйыл күһүн алтынньыга өрөспүүбүлүкэ бөдөҥ производственнай хаһаайыстыбалара — “Өлүөхүмэ кыладабыайа”, Хатастааҕы сибиинньэ комплекса, “Бөртө” сылгы собуота уонна “Нөмүгү агрофирмата ХЭУо-лар “Анаабыр алмаастара” хампаанньаттан “Туймаада” АУо үп-харчы агропромышленнай хампаанньатын бас билиитигэр бэриллибиттэрэ.
“Туймаада” АУо ҮХАПХ генеральнай дириэктэрин солбуйааччы Александр Артемьев этэринэн, хаһаайыстыба хотонун сылытаары бүгүн Тутуу ырыынагыттан итии салгынынан үрэр пушка атыылаһан илдьэн эрэллэр. Оттон салайааччы боппуруоһа сарсын, бэнидиэнньиккэ, быһаарыллыахтаах. Бу күннэргэ анаммыт Владимир Иванов ууга тааһы бырахпыттыы “сүппүт”. Оттон алтынньы бүтүүтэ дириэктэр эбээһинэһин толорооччунан анаммыт Денис Петрову үлэ кэлэктиибэ ылымматаҕа. “Нөмүгүлэр” сүрүн туруорсуулара – Николай Федотовы ХЭУо генеральнай дириэктэрин дуоһунаһыгар төнүннэрии.
Яков Барабанов кэнниттэн б.дь. муус устарыгар дириэктэринэн Николай Федотов анаммыта. Кини агрофирманы эрдэ, 2011-2015 сылларга, эмиэ салайа сылдьыбыта. “Больничнайга сылдьар кэммэр устубуттара” диэн үҥсүһүөх курдук этэ эрээри, дириэктэр дуоһунаһыгар дураһыйбатын туһунан сайабылыанньа суруйан киллэрбит дииллэр. Онон тэрийээччи тэрилтэ – “Туймаада” АУо киллэрэр кандидатураларыттан ким үлэ кэлэктиибин сөбүлэҥин ылан хаһаайыстыбаны салайара биллибэт. Быһыы-майгы хайдах тосхоллонорун салгыы сырдатыахпыт.
Василий НИКИФОРОВ,edersaas.ru