Алтынньы 26-28 күннэригэр Нерюнгрига, “Шахтер” спорткомплекска өтөр-наар буолбатах күрэхтэһии ыытыллаары турар. Оройуон хапсаҕайга федерациятын салайааччыта Роман Олейник көҕүлээһининэн итиэннэ быһаччы тэрийиитинэн манна Уһук Илин маҥнайгы аһаҕас күрэхтэһиитэ буолар.
Онно кыаҕы, күүһү көрүнүү быһыытынан, тэрийээччилэр олунньу ыйга Андрей Запорожскай кэриэһигэр көҥүл тустууга Уһук Илин турнирын иитинэн сүүстэн тахса кыттааччылаах хапсаҕай турнирын тэрийэн тураллар.
Саха төрүт оонньуутун дойду үрдүнэн киэҥник тарҕатар сыалы-соругу туруорунар Нерюнгри энтузиастара бастакы хардыыларынан Уһук Илин түһүлгэтэ буолуоҕун этэллэр. Ол инниттэн хапсаҕай федерациятын тэриммит, биитэр оннук дьаһанарга мэктиэ суругу түһэрбит куораттар хамаандаларын (алта спортсмен, биир бэрэстэбиитэл) борогуоннарын, аһылыктарын, түһэр сирдэрин Нерюнгри хапсаҕайга федерацията уйунарга бэлэмин иһитиннэрэр. Ону сэргэ аһаҕас күрэстэригэр Тува, Монголия сүүмэрдэммит хамаандаларын ыҥырар санаалаахтар.
Түһүлгэ балаһыанньатын оҥорууга Манчаары Баһылай аатынан спорт национальнай көрүҥнэрин киинин исписэлиистэрэ, Саха сирин хапсаҕайга федерациятын толорооччу дириэктэрэ Алексей Мостахов үлэлэспиттэр. Күрэс алта ыйааһынынан ыытыллар: 55 кг, 62 кг, 70 кг, 80 кг, 90 кг итиэннэ 90 кг үөһээ.
Күрэхтэһии бирииһин пуондата биир мөлүйүөн солкуобайга тэҥнэһэр. Кыайыылаахтар 100 тыһыынча солкуобайынан, иккис буолбуттар – 50, үһүс миэстэлэспиттэр 30 тыһыынчанан биһирэниэхтэрэ. Муҥутуур кыайыылааҕы быһаарар күрэс 16-тан итэҕэһэ суох бөҕөс кыттар эрэ буоллаҕына ыытыллыаҕын тэрийээччилэр иһитиннэрэллэр.
Роман ПОПОВ, «Саха сирэ» хаһыат, edersaas.ru