Тохсунньу 24-26 күннэригэр Нерюнгри оройуонугар Саха Өрөспүүбүлүкэтин Спорка министиэристибэтин күннэрэ ыытыллыаҕа. 2017 сыл өрөспүүбүлүкэҕэ Ыччат сылынан биллэриллибитинэн, быйылгы тэрээһиҥҥэ СӨ Ыччат дьыалатыгар уонна дьиэ кэргэн политикатыгар министиэристибэтин тэҥэ Гражданскай уопсастыба институтун сайыннарыы министиэристибэтэ кыттыыны ылыахтара. Онон, бу тэрээһини “Нерюнгрига ыччат, спорт уонна уопсастыба күннэрэ” диэн ааттыахха сөп.
Петр ПАВЛОВ, “Саха сирэ” хаһыат, edersaas.ru
Нерюнгри оройуонун бары нэһилиэнньэлээх пууннарыгар: Нерюнгри куоракка, Беркакит, Золотинка, Серебрянай Бор, Хани, Чульман бөһүөлэктэрин хабан, Спорт министиэристибэтин түөрт бөлөҕө үлэлиэҕэ. Бөлөх састаабыгар миниистири солбуйааччылар, спорт тэрилтэлэрин салайааччылара, итиэннэ физическэй култуура бастыҥ учууталлара, спорт көрүҥнэринэн тренердэр киирдилэр. Олохсуйбут үгэһинэн, тэрээһин чэрчитинэн нэһилиэнньэҕэ анаан маастар-кылаастар, үөрэнээччилэри кытта көрсүһүүлэр уонна табаарыстыы оонньуулар ыытыллыахтара.
Күннэр чэрчитинэн Спорт, Ыччат уонна Уопсастыба министиэристибэтин Нерюнгри оройуонун салалтата кыттыылаах көһө сылдьар мунньаҕа ыытыллыаҕа.
Улууска тиийэн физкультурнай-чэбдигирдэр, спортивнай-маассабай үлэҕэ быһа көмөнү оҥорор тэрээһиннэр биһиги өрөспүүбүлүкэбитигэр өссө 2003 сылтан ыытыллаллар. Итиэннэ, биллэн турар, туһаттан атыны аҕалбат.
Бу туһунан биһиэхэ Спорт министиэристибэтин пресс-киинэ иһитиннэрэр.
Петр ПАВЛОВ, “Саха сирэ” хаһыат, edersaas.ru