Мэҥэ Хаҥалас Өлөчөй нэһилиэгэр командировкаҕа сырыттахпына, олохтоох дьаһалта үлэһиттэрэ: «Биһиэхэ бэйэтигэр саха балаҕанын туппут киһи баар. Соторутааҕыта «НВК»-лар кэлэн телевидениеҕэ устан барбыттара. Кинини кытта көрсүбэккин дуо?» — диэн ыйыта тоһуйбуттара.
Мин, сатабыллаах киһи баарын истээт, үлэм хайысхатынан суруйар тиэмэм буолан, дьонунан ыйдаран ол балаҕаннаах киһиэхэ тиийбитим. Балаҕан хаһаайына Прокопий Негнюров дьиэтигэр баар кэмэ этэ.
— Уруккуттан саха балаҕанын туттар баҕалаах этим. Хас да кинигэни көрөн, үөрэтэн баран, киһи бэйэтэ да холкутук туттуон сөп эбит ээ дии санаат, уолаттарбын көмөлөһүннэрэн тутан барбытым. Балаҕаным 6х6 кв. м иэннээх, — диэн кэпсиир Прокопий Анатольевич.
Дьиэ хаһаайына балаҕаныгар киллэрэн тутуутун билиһиннэрдэ.
- Балаҕаҥҥа киириигэ күрүөтүн маһа үрэххэ үүнэр синньигэс талахтан оҥоһуллубута, саха киһитигэр ураты тыыны саҕар.
Муннуктара «ньиэмэс» ньыматынан тутуллубут буолан, киһи хараҕа халтарыйар көстүүтэ.
- Балаҕан Өлөчөйгө үүнэр тиит мастан тутуллубут. Муостата — бэстэн. Хаһаайын, сүрүннээн, «дружбанан», сүгэнэн туттар эбит. «Барыта ааҕыы-суот. Биири эмэ сыыстыҥ да, ол маһыҥ быраҕыллар«, — диэн кэпсиир Прокопий Анатольевич.
- Оһоҕун ньаалбаан буочукатын оһох моһуоннаан сыбааркалаан баран, таһынан кирпииччэни уурбут. «Отуннахха, көмүлүөк оһох сылааһы биэрэрин курдук», — диэн быһаарар хаһаайын.
- Балаҕан тээбиринэ эмиэ уу сахалыы. Түөртээх хаптаһынынан остуол оҥорбут.
- Оһуора-мандара — уотунан уматан оҥоруу (выжигание). Остуол оһуорун ис хоһооно: «Үрүҥ күн анныгар түөрт өттүттэн көмүскэллээх буолан, дьоллоохтук-соргулаахтык улуу кытылга олоруоҕуҥ» — диэн. Бу «Сахалыы оһуордар» кинигэттэн ылбытым, — диэн кэпсиир Прокопий Негнюров.
- — Бииргэ төрөөбүттэр уон биирбит. Кыра эрдэхпититтэн ийэбитин кытта сайылыкка үөскээбит дьоммут. Өрүү тыа хаһаайыстыбатыгар, пиэрмэҕэ үлэлээбит киһибин. Манна сэбиэскэй кэмҥэ үс хотонунан 300-чэкэ ынах турара. Бэйэм 18 ынах сүөһүлээхпин, онтон ыанар ынаҕа — биэс. Аҕам эрдэ өлбүт буолан, аҕа ууспун үчүгэйдик билбэппин. Билсибэппит. Ол эрээри биир улахан уус киһи баара үһү. Ийэбит өттүгэр уус киһи суох. Арааһа, өбүгэлэрбиттэн тардыылаах буолан, уһанар дьарыктаахпын«, — диэн кэпсэтиибитин түмүктүүр сэһэргэһээччим.
… Сатабыллаах тыа сирин киһитэ барахсан билигин, сайыҥҥы куйаас күҥҥэ бэйэтэ туппут балаҕаныгар олорон, күннээҕи түбүгүн бүтэрэ-оһоро сырыттаҕа.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.
+1
+1
+1
+1
+1
+1
+1