Сыл аайы, саас уонна күһүн, өрүһүнэн суол сабылларын саҕана, өрүс нөҥүө сытар улуустар хаайтаран хаалаллар. Өрүһү туоруурга олус үрдүк сыаналаах “Хивустар” сылдьаллар. Ыксаабыт дьон туоруулларыгар эрэ тиийэллэр. Оттон “Полярные авиалинии” АН-2 сөмөлүөттэрэ улуустарга удамыр сыанаҕа таһалларын аҕыйах киһи билэр. Сөмөлүөт хайдах сылдьарын билээри анаан Уус Алдан Бороҕонугар көтөн кэллим.
Сөмөлүөт Маҕан аэропордуттан чугас эҥир сытар улуустартан, Уус Алдаҥҥа уонна Аммаҕа көтөр эбит. Регистрация сөмөлүөт көтүөн час иннинэ саҕаланна.
Мин көрөрбүнэн, элбэх маллаах, саастаах дьон сөмөлүөтү кэтэһэ олороллоро.
Оптуобуһунан сөмөлүөккэ иттилэр. Кыра Ан-2 сөмөлүөккэ 12 киһи олордо. Бастаан сөмөлүөт тымныы курдук этэ да, үөһээ тахсыбытыгар сылыйда. Көтөн иһэн көрдөххө, өрүһү дьон сатыы туораан иһэрэ көстөр. Бачча сөмөлүөт көтөрүн кэннэ, тоҥо-тоҥо сатыы хаампатах киһи дии санаатым.
40 мүнүүтэнэн Бороҕоҥҥо анаан оҥоһуллубут сөмөлүөт түһэр сиригэр түстүбүт. Айанньыттар түһээттэрин кэннэ, тута төптөрү айаннааччылар олорустулар. Өр буолбакка, сөмөлүөт халлааҥҥа күөрэйэн таҕыста. 40 мүнүүтэнэн Маҕан аэропордугар түстүбүт. Айанньыттарым этэллэринэн, сөмөлүөт көтөрө олус табыгастаах эбит. Нэдиэлэҕэ иккиттэн элбэхтэ көтөрө буоллар, өссө үчүгэй буолуо этэ дииллэр.
Суол сабыллан турар кэмигэр, олохпунан оонньоон сатыы, эбэтэр нэдиэлэтээҕи олорор харчыбын төлөөн “Хивуһунан” айанныам оннугар, сөмөлүөтүнэн 1500 солкуобайга көппүтүм ордук курдук. Элбэх маллаах, бэйэлэрин кыаммат саастаах дьоҥҥо, “Полярные авиалинии” Ан-2 сөмөлүөтэ көтөрө олус туһалаах диэн бэлиэтээтим.
«Полярнай авиалиниялар» хампаанньа АН-2 дьоҕус сөмөлүөтэ Маҕантан Уус Алдан Бороҕонугар бастакы көтүүтүн алтынньы бүтүүтэ оҥорбута. Аны нэдиэлэҕэ иккитэ: оптуорунньукка уонна бээтинсэҕэ сылдьар. «Сыл ахсын саас-күһүн өрүс суола сабыллар кэмигэр Дьокуускайга киирэргэ хаайтарыы буолара. Полярниктар улуустарга дьоҕус авиацияны сөргүтэн эрэллэрэ хайҕаллаах. Биһиэхэ улуус киинигэр аэропуорт баар эрээри, үксүн таһаҕас эрэ тиэйэр этилэр. Оттон билигин сөмөлүөт дьону таһар», — диэн Уус Алдан баһылыга Алексей Федотов үөрүүтүн үллэстэр.
Кини, нэһилиэнньэ сэргээн, билиэт атыыга бардаҕына, сөмөлүөт куруук сылдьар буолуон сөбүн эттэ. Росавиация СӨ куттала суох буолууну хааччыйар инспектора Владимир Новиков: «Аэропуорт былаһаакката АН-2, АН-3 кыра сөмөлүөт көтөрүгэр, дьону тиэйэригэр бары ирдэбилгэ эппиэттиир, оннооҕор түүн кытта көтүөххэ сөп», — диир.
Николай Попов, «Саха сирэ» хаһыат, edersaas.ru