Аммаҕа харыы төлөрүйэн, уу бытааннык да буолар түһэ турар. Көмөнү оҥоруу саҕаланна. Ол курдук, ситэтэ суох чахчынан, улуус үрдүнэн дьиэлэрин уу ылбыт 603 киһиэхэ көмө оҥоһуллар.
edersaas.ru, Раиса Сибирякова
Ол иһигэр, Амма сэлиэнньэтигэр 62 ыалга (211 киһи), Чапчылҕаҥҥа 75 ыал (260 оҕо), Мээндигигэ 8 ыал (19 киһи), Өнньүөскэ 4 ыал (15 киһи), Абаҕаҕа 23 ыал (98 киһи). Бу күннэргэ улууска арыгы атыыта бобулунна.
Бэрээдэги көрүү-истии күүһүрдэ. Уу ылан, хаһаайыттара эвакуацияламмыт дьиэлэртэн малы-салы уоруу тахсыбатын туһугар полиция патруллааһыны олохтоото.
Бу туһунан ПДН уонна учасковай боломуочунайдар управлениеларын начальнига полиция майора Валерий Дьяконов иһитиннэрдэ.
— Амма уута халааннаан, айылҕабыт биһигини тургутан көрдө. Улуус олохтоохторо бу ыарахан кэмҥэ түмсүүлээхтэрин көрдөрдүлэр, уу ылбыт дьиэлэриттэн дьону көһөрүүгэ, көмөнү тэрийиигэ, субуотунньугунан буору кутууга о.д.а. үлэлэргэ көхтөөхтүк кытталлар. Буор быһыт оҥороммут, стадиоммутун уу ылбата. Бэҕэһээ Ил Дархан нэһилиэнньэни кытары көрсүһүүгэ: ‘»Тыа сирин спортивнай Оонньууларын эһиилгигэ көһөрүөххүтүн сөп» – диэбитэ. Улууска Оонньуулары көрсөр үлэ барыта график быһыытынан баран испитэ, улахан өттө бүппүтэ. Билигин халаан содулун туоратар үлэни сэргэ тутан, Оонньууларга бэлэмнэниини, сквердэри оҥорууну салгыахпыт. Онон Оонньуулары ыытыахпыт, – диэтэ улуус баһылыга Николай Архипов.
Раиса Сибирякова, Дьокуускай – Амма, edersaas.ru