Николай Крылов: «Тарас Десяткин көрүллэ-харайылла сылдьар, сэтэрээбэтиннэр»
Бу күннэргэ батсаап муҥунан айдааран, баар суох киэн туттар киһибитин, САХА СААРЫНЫН Тарас Гаврильевич Десяткины, кини чугас аймах-билэ дьонун, олоҕун устата эн-мин дэһэн бииргэ үлэлээн кэлбит дьоннорун баһааҕырдан сир-буор сирэйдии сатаан эрэллэр.
Еdersaas.ru
Күлэ-күлэ күлбүтүн таптайаллар…
Төһө да бэйэбит омукпутун үрдүктүк туттарбыт, бэрдэ суох өрүттэрбит баалларын билинэргэ тиийэбит. Урут даҕаны бэрт былдьаһарбытын, чорбойоору гыммыт киһини таҥнары тарда сатыыр, чулууларбытын сэтэриир, өрүү ордугургуур, атахтыы сатыыр адьынаттаахпытын билэбит.
Дьадаҥы, дьаранаас олохтоох, кыаммат, кылгас өйдөөх аҕыйах ахсааннаах буоламмыт, бэйэ бэйэбитин кэтэһэ-манаһа, ордугурҕаһа, умсарса сатыыр адьынастаах буоллахпыт. Ити аҕыйах ахсааннаахпыт содула буолуон эмиэ сөп. Улахан омуктар киэҥ-холку майгылаах, кыраны дарбата сатаабат, киһи көҥүлүн күөмчүлээбэт, сиилии-хоһулуу сылдьыбат буолаллар эбээт.
Дьиҥэр, Тарас Гаврильевич олорор дьиэтэ суох буолбут кырдьаҕас буолбатах. Туймаада хочотун биир бэртээхэй хонноҕор чөкө уһаайбалаах. Онтукатыгар обургу уораҕай туттан уолун Андрей Тарасовиһы кытта быр бааччы олорон, саастаах киһи сиэринэн чуумпуга наадыйан, тэлгэһэтигэр дьоҕус дьиэ туттаран олорбута. Уола Андрей ону силигин ситэрэн, аныгылыы өрөмүөн оҥорторон турар. Тарас Гаврильевич кыанара буоллар, ол дьиэтигэр оҕолорун бэлэмигэр төһө баҕарар күөлэһийэр усулуобуйалаах. Ону баара, кырдьар кырыыһа, ыарыы ситэн кэллэҕэ… Хас да сыллааҕыттан аймах-билэ, атас-доҕор дьонун кытта билбэт буолар ыарыыга ылларбыта, эмп тэрилтэтэ эрэ көрөр-харайар дьылҕаланна. Кинини көрөн-истэн, бүөбэйдээн сытыараллар. Дьонун таһынан былаас анаабыт киһитэ эмиэ көрө-харайар. Улахан ааттаах-суоллаах быраас идэлээх быраата Роман Десяткин тус кэтэбилинэн кырдьаҕаспыт эмтэнэн, көрүллэн-харайыллар.
Төһө да сэтэрээбит, ордугургаабыт иһин, Тарас Десяткин курдук Саханы Саха дэппит, омукпутун, дойдубутун суон сураҕырдыбыт ДЬОҺУН БЭЙЭЛЭЭХ ДЬОРУОЙ киһибит үтүө аатын, ааһа баран омукпут чиэһин, суобаһын — араас куһаҕаны туһанан, күлэ-күлэ күлбүтүн таптайа сатыыллара абатын эбитин ньии!
Николай КРЫЛОВ, СӨ Суруналыыстыкаҕа Судаарыстыбаннай бириэмийэтин лауреата.