Арассыыйа икки бөҕөһө — Николай Охлопков уонна Зураб Капраев, гражданстволарын уларытыыга сокуонунан көрүллүбүт бары докумуоннары толорон, Румынияҕа бэриниилээхтик сулууспалыырга бирисээгэ биэрдилэр.
Үөрүүлээх сиэргэ-туомҥа Румыния ыччат, спорт дьыалаларыгар миниистирэ Иоана Бран, гражданство боппуруостарыгар национальнай кэмитиэт баһылыга Андрей Тину итиэннэ тустуу федерациятын бэрэсидьиэнэ Разван Пыркалабу кыттыыны ыллылар.
Саха тустууга оскуолатын 23 саастаах иитиллээччитэ Николай Охлопков 65 киилэҕэ диэри ыйааһыҥҥа тустуоҕа. Оттон биллиилээх тириэньэр Зелимхан Гусейнов үөрэнээччитэ, Николайтан икки сылынан балыс Зураб Капраев 70 киилэлээхтэргэ күүһүн холоһуоҕа.
Иоана Бран дойду саҥа гражданнарын көмөтүнэн 2020 сылга Токиоҕа ыытыллар Олимпийскай оонньууларга Румыния мэтээл ыларга суоттанарын эттэ. Манна эдэр бөҕөстөргө үтүө холобурунан эмиэ Арассыыйаттан кэлбит легионер Альберт Саритов буолар. Кини ааспыт Риотааҕы Олимпиадаҕа 97 киилэҕэ боруонса мэтээли ылан турар.
Роман Попов, edersaas.ru
Хаартыска Интэриниэттэн ылылынна.