Саха суруналыыстыкатын уонна бэчээтин уос номоҕор киирбит, 20-тэн тахса кинигэ ааптара, уопсастыбаннай деятель Нина Иннокентьевна Протопопова төрөөбүтэ 90 сылыгар аналлаах дьаһаллар өрөспүүбүлүкэҕэ ыытылла тураллар. Олунньу 21 күнүгэр Дьокуускайга Нина Протопопова 15 сыл олорбут Ленин проспегын 22/1 дьиэтигэр мемориальнай дуоска туруорулунна.
Надежда ЕГОРОВА, «Саха сирэ» хаһыат, edersaas.ru
Долгутуулаах тэрээһиҥҥэ биир идэлээхтэрин, үөлээннээхтэрин, аймахтарын сэргэ мемориальнай дуоска ааптардара: худуоһунньук Дмитрий Мухин уонна скульптор Афанасий Романов кытыннылар. Бу күнтэн ыла куорат килбэйэр киинигэр баар сүдү киһи сырдык мөссүөнүгэр куорат олохтоохторо уонна ыалдьыттара сүгүрүйэн, ахтан-санаан ааһар буолуохтара.
Бу күн өрөспүүбүлүкэтээҕи пресс-кииҥҥэ ыытыллыбыт ахтыы киэһэтигэр Нина Иннокентьевна оҕолоро: Россия Наукатын академиятын Саха сиринээҕи салаатын бэтэрээнэ Петр Кондаков уонна СӨ доруобуйа харыстабылын туйгуна Елизавета Николаевна, сиэн балта, СӨ доруобуйа харыстабылын туйгуна М.Шамаева, чугас аймаҕа В. Федорова кытыннылар.
Сүрүн иһитиннэриини СӨ Суруналыыстарын сойууһун бэрэссэдээтэлэ Галина Бочкарева оҥордо. Кини Нина Иннокентьевна оҕо суруналыыстыкатыгар, үүнэр көлүөнэни иитиигэ, чөл олоҕу сырдатыыга, эдэр суруналыыстары бэлэмнээһиҥҥэ кылаатын уонна Саха сиригэр уопсастыбаннай үлэтин ахтан-санаан ааста.
Салгыы сүдү киһибит үөлээннээхтэрэ, өрөспүүбүлүкэ киэн туттар дьоно Альбина Поисеева, Анастасия Божедонова, Климент Корякин уо.д.а. оччотооҕу кэмнэри ахтан-санаан аастылар.
Саха Өрөспүүбүлүкэтин «Ытык сүбэтин» бэрэссэдээтэлэ Люлия Григорьева Нина Иннокентьевна олоҕун бүтэһик күннэригэр: «Мин орто дойдуга ытык иэспин толордум – кэргэним туһунан кинигэни таһаардым», – диэн кэс тылын эппитин уйадыйа аҕынна.
СӨ норуодунай бэйиэтэ Иван Мигалкин аан бастаан бэчээттэниитэ 50 сыл анараа өттүгэр оҕо хаһыатыттан саҕаламмытын, хоһоонун бэчээттээн үтүө көмөнү оҥорбуттарын бэлиэтээн туран, Нина Иннокентьевнаҕа уонна хаһыат кэлэктиибигэр махтанна. «Ханнык баҕарар суруйар киһи хаһыакка бэчээттэннэҕинэ, күөҕүнэн сириэдийэр аал луук маска тардыстан барар. Хаһыат үлэһиттэрэ оҕо эйгэтигэр киирэн, оҕо хаһыатын таһааран, саха литэрэтиирэтин байытыһалларыгар өрүү махтанабын», – диэтэ.
«Бэлэм буол» үлэһиттэрэ саха норуодунай суруйааччыта, саха мындыр кырдьаҕаһа Николай Мординов—Амма Аччыгыйа кинилэр кэлэктииптэригэр үлэлээбитинэн куруутун киэн тутталлар, кини сырдык аатыгар сүгүрүйэллэр. Онон, Николай Мординов кыыһа Муза Николаевна ыалдьыттааһына «Кэскиллэр» тэрээһиннэрин өссө дириҥ суолталаабыта саарбаҕа суох.
Муза Николаевна: «Мин Нина Иннокентьевнаны чугастык билбиппиттэн олус үөрэбин. Кини мэлдьи наадалаах кэммитигэр баар буолара. Николай Егорович аҕам сааһыгар «Бэлэм буолга» үлэҕэ ылыллан, күн сириттэн күрэниэр диэри бу иллээх-эйэлээх кэлэктиипкэ үлэлээбитинэн дьоллоох. Эрэдээктэр Нина Иннокентьевна аҕам олоҕор ыарахан сылларыгар, тапталлаах кыыһын Леночканы күн сириттэн күрэммит кэмигэр үлэҕэ ылан, олоҕун салҕаабытыгар куруук махтана саныыбын. Кини кэлэктиипкэ кэлэн үтүө санаалаах дьон болҕомтотун, өйөбүлүн, олохтон дуоһуйууну билбитэ», – диэн Нина Иннокентьевна үтүө санаатыгар сүгүрүйдэ.
Нина Протопопова биир дойдулааҕа Климент Корякин Бүлүү Уоттутун ыччаттара мунньустан, эдьиийдэрин төрөөбүт сиригэр-уотугар, өтөҕөр тиийэн бэлиэтии сылдьалларын, ити сүдү киһини ытыктааһын бэлиэтэ буоларын улаханнык астынан туран бэлиэтээтэ.
Бу күн Сэбиэскэй Сойуус дьоруойа, Нина Иннокентьевна тапталлаах кэргэнэ Николай Кондаков аата дириҥ ытыктабылынан ахтылынна. «Сахабэчээт» тэрилтэ генеральнай дириэктэрэ Филипп Пестряков суруналыыстартан соҕотох Сэбиэскэй Сойуус дьоруойа Николай Кондаков аатын «Саха» Национальнай көрдөрөр-иһитиннэрэр хампаанньаҕа иҥэрэр наадатын туһунан этиитин өйдөбүнньүк киэһэтин кыттыылаахтара ытыс тыаһынан ылыннылар. Филипп Петрович Н.Кондаков 100 сааһын көрсө Дьөккөн нэһилиэгэ, оскуолата, улуус дьаһалтата туруорсалларыгар баҕа санаатын тириэртэ.
Бүгүҥҥү тэрээһиҥҥэ Бүлүү колледжын дириэктэрэ Семен Иванов, Н.Кондаков аатынан Дьөккөн оскуолатын дириэктэрэ Егор Петров уо.д.а. биир дойдулаахтара кыттыылара саха тумус туттар дьоно Нина Протопопова уонна Николай Кондаков ааттарын биир дойдулаахтара умнубаттарын, үйэтитэллэрин тыыннаах туоһуларынан буолла.
Үбүлүөйдээх тэрээһини Бүлүү Тыымпытыттан сылдьар Майя Сергина уонна эстрада чаҕылхай сулуһа Анатолий Бурнашев киэргэттилэр. СӨ үтүөлээх артыыһа Анатолий Бурнашев: «Нина Иннокентьевна миигин тэрээһиннэригэр ыҥырдаҕына, куруук «Учууталбар» уонна «Үрүмэччи маҥан ат» ырыаларбын толорорбор көрдөһөөччү диэн туран, бу ырыаларын, мэлдьи буоларын курдук, ис сүрэҕиттэн толордо.
ЫСПЫРААПКА:
— 1961-2011 сс. «Бэлэм буол», «Юность Севера», «Кэскил» оҕо өрөспүүбүлүкэтээҕи хаһыаттарын эрэдээктэрэ.
— Суруналыыстыка салаатыгар СӨ Судаарыстыбаннай бириэмийэтин лауреата, «Гражданскай килбиэн», Арассыыйа Суруналыыстарын сойууһун «Честь, Профессионализм. Достоинство» бочуотунай бэлиэтин хаһаайката.
— Кини аата Гиннес рекордун кинигэтигэр«Самое продолжительное пребывание в должности главного редактора СМИ» номинацияҕа киллэриллибитэ.
Надежда ЕГОРОВА, «Саха сирэ» хаһыат, edersaas.ru